Manuel Gallego, alcalde de Taboadela, é o rexedor máis veterano de Galicia
07 jul 2017 . Actualizado ás 20:19 h.O alcalde de Taboadela chega á casa consistorial nun coche que quita o hipo e antes de que lle diga nada me lembra que unha cousa é a política e outra a vida persoal. O certo é que con Manuel Gallego (Taboadela, 1937) gozo dun intre máis divertido do que agardaba. Imaxino que nunca lle fixeron unha entrevista deste tipo e o rexedor parece pasarllo tan ben como eu.
-Vostede é alcalde desde 1972. Non se cansa?
-¡E concelleiro desde 1967! Direille que estou como o primeiro día.
-En ilusión quere dicir.
-Claro. Para estar aquí hai que ter ilusión.
-Non pensou na substitución?
-Non, non. Aínda estamos na metade do mandato e eu teño un compromiso. A cara ou se dá ou non se dá. Sobre o futuro non podo dicir nin unha cousa nin a outra.
-Como se meteu na política?
-Eu estiven nove anos no País Vasco e ao regresar fíxenme industrial. Aínda que din iso de «ave de pico non fai a seu dono rico», fíxenme avicultor e creei unha empresa que estivo na fundación de Coren. Entón chamoume un alcalde que había e propúxome entrar polo terzo familiar. Daquela o clero tiña moito poder e aínda que eu era un pouco randa, colléronme. Daquela xa tiña un 600 e digamos que destacaba un pouco no pobo. Eu caseime con 37 anos.
-En todos estes anos, o concello terá cambiado moito.
-Cando eu cheguei, o concello estaba nunha casa de alugueiro. Movíase por varios pobos. Collían os catro libros que había e ían dun sitio a outro. O patrimonio do concello era cero. Agora é de 30 millóns de euros. Eu na miña vida privada non fixen tanto capital como o Concello.
-Cónteme algunha trastada que fixese de pequeno.
-¡Uy! Fixen moitas. Unha vez roubámoslle uns galos a un matrimonio do pobo. Fómolos cociñar cuns amigos a casa dun deles e cando os estabamos comendo apareceu o pai deste amigo e non queira saber a rifa que nos montou. Foi inesquecible.
-Quen é o político máis simpático que coñeceu?
-Baltar pai. É un amigo íntimo e o será mentres vivamos. El axudoume moito e eu tamén, porque lle entreguei todas as miñas maiorías absolutas. Dirase o que se queira, pero para o rural de Ourense foi un fóra de serie. É un home irrepetible. Era moi resolutivo.
-E o político máis duro?
-Tiven os meus encontros con moitos, pero lembro un con Agustín Hernández no que estiven a piques de irme. Aínda que logo se reconduciu a entrevista.
-E ao que máis admira?
-A nivel Ourense, Baltar pai. E a nivel Galicia, gústame moito Núñez Feijoo. É moi serio.
-Que é o máis amargo da política?
-As críticas inxustas cando traballas con paixón. Doen moito. Dan ganas de deixalo todo. Pero a verdade é que a política engancha e se eu levo tantos anos é por culpa dos meus inimigos políticos.
-Segue vostede para que non ocupen o seu posto?
-Iso é.
-Cales son as súas afeccións?
-A gastronomía e os touros. Hai pouco antollóulleme ir a Burgos, e fun. Vou a Valladolid , a Salamanca e na Peregrina sempre quedo.
-Algunha vez hase apostado o bigote?
-Algunha vez, pero sempre gañei. E se perdeuno, volveríamo a deixar. Non me gustan os cambios, son bastante conservador.
-Bo, de mozo igual non o era tanto.
-Corrinme as miñas esmorgas. Xa lle digo que casei con 37 anos e tiven bastantes noivas. Vivín a vida e sígoa vivindo.
-Sabería facer unha tortilla de patacas?
-Malamente. Non cociño.
-Que é o último que se comprou?
-O coche. Sempre me gustou ter bos coches.
-De que se arrepinte?
-[Pénsallo un momento] Dalgunhas cousas... pero prefiro non dicilas.
-Lembra onde lle pediu matrimonio á súa muller?
-Si. Levaba xa nove anos con ela e un día no canto de subir el ao coche subiu a sogra. Púxome as cousas claras, así que me comprometín antes coa miña sogra que coa miña muller, ja, ja.
-Ten algo postizo?
-Algúns dentes.
-Que tal co WhatsApp?, úsao moito?
-Nunca. O móbil non me gusta moito.
-Unha canción.
-Son mineiro, de Antonio Molina.
-O máis importante na vida.
-Vivila. E se pódese, vivila ben.
Moi de preto
Manuel Gallego Alcalde de Taboadela (Ourense), o máis veterano de Galicia