Galicia logra no 2016 máis de 111.200 doazóns de sangue, aínda que se estancan as cifras

Os galegos realizaron no ano 2016 un total de 111.276 doazóns de sangue, unha cifra coa que a comunidade acada as recomendacións da OMS -entre 40 e 60 extraccións por mil habitantes-, como fixo nos últimos dezasete anos. Pero a directora da Axencia de Doazón de Órganos e Sangue, Marisa López, insiste na necesidade de non baixar a garda. Porque o primeiro trimestre do 2017 foi máis negativo que o do pasado ano, e porque os datos acadados no 2016, case idénticos aos do 2015 aínda que cun lixeiro incremento, lográronse cun enorme traballo en campañas de información e chamamentos aos doantes.

No entanto, tanto a directora da Axencia como o director xeral de Asistencia Sanitaria, Jorge Aboal, destacaron na presentación do balance do 2016 a solidariedade dos galegos, «xa que aquí cada un dos números ten dous rostros, o da persoa que altruistamente doa, e o de quen se beneficia», apuntou Aboal.

A comunidade segue nunha taxa de 41 extraccións por cada mil habitantes, aínda que só 80 dos 314 concellos están nos niveis que marca a OMS. Por provincias, A Coruña e Pontevedra acadan esta recomendación e Lugo e Ourense non. Por concellos chama a atención o caso de Padrón, que ano tras ano se converte no municipio cunha maior taxa de doazóns, superando o centenar por mil habitantes. O perfil do doante en Galicia é o dun home que vive nun concello de máis de cinco mil habitantes e de mediana idade. Porque a metade das doazóns pertencen a maiores de 43 anos, mentres que só o 25 % tiñan menos de 33 anos. Un dos datos máis positivos do balance presentado é o número de doantes novos. No 2016 achegáronse por primeira vez a unidades móbiles ou a puntos fixos 8.551 persoas que nunca doaran, un 11 % máis que no 2015. Ao ser os grupos sanguíneos maioritarios na poboación A positivo e 0 positivos, ambos concentran o 72,6 % das doazóns.

---

---

---