O atropelo do policía prodúcese cando máis presión se está exercendo contra os condutores de risco
21 may 2017 . Actualizado ás 05:00 h.Hai miles de infractores reincidentes en alcoholemia e drogas que circulan polas estradas. Cara a eles van dirixidas as novas medidas do Ministerio do Interior e da Dirección Xeral de Tráfico e que pretenden apartar da estrada a quen dean positivo en alcol ou drogas dúas veces en menos de dous anos. Trátase de que ese tipo de condutores non volvan coller o volante ata que estean rehabilitados. Tráfico está convencido de que eses infractores teñen un problema co alcol ou coas drogas, unha adicción. E dese mal teñen que curarse antes de poder coller un coche. Con ese convencemento, enviarán aos reincidentes a unha revisión médica extraordinaria para que sexan avaliados e saber así se teñen ou non unha patoloxía. Antes, a DXT retiraralles o carné de conducir ata que o tribunal decida se son aptos para volver á estrada ou se teñen que someterse a un tratamento rehabilitador para poder recuperar o permiso de conducir.
Esta é a medida estrela máis inmediata, pero os responsables de Tráfico queren ir máis aló e traballan na reforma da Lei de Seguridade Viaria para endurecer o reproche cara a determinados comportamentos que causan risco na estrada. E o principal é o alcol. O director xeral de Tráfico, Gregorio Serrano, xa avanzou que se estuda, como primeira medida, a implantación de táxaa cero de alcol para os condutores profesionais e para os noveis que carecen de experiencia. A taxa de alcol permitida para elas na actualidade é 0,15 na proba de aire. Dez países europeos xa aplican esa taxa, cinco dos cales estenden o veto ao alcol a todos os condutores.