Unha xuíza esixe explicacións a Sestayo tras suspenderse un xuízo pola súa incomparecencia
GALICIA
A avogada ferrolá manifesta que non acudiu á vista penal porque a procuradora non llo notificou
29 abr 2017 . Actualizado ás 05:00 h.A avogada ferrolá Beatriz Sestayo terá que xustificar ante a titular do Xulgado do Penal n.º 1 de Ferrol os motivos polos que non compareceu nun xuízo fixado para as dez da mañá de onte, no que tería que exercer como letrada de oficio en defensa dun acusado dun roubo. A ausencia de quen, na vida política, é secretaria xeral do PSOE local e concelleira en Ferrol, obrigou a suspender a vista e fixar unha nova data, situación que causou gran malestar na maioría dos asistentes, incluídos os propios procesados, aos que a xuíza manifestou que pediría explicacións pola incomparecencia da avogada.
Os funcionarios xudiciais trataron de contactar con ela por teléfono, pero tíñao apagado ou fóra de cobertura, polo que, despois de media hora de espera, optouse pola suspensión. Cando xa se adoptou o acordo e a maioría das testemuñas habíanse marchado, Sestayo respondeu as chamadas perdidas e comunicou ao xulgado que podía enviar a outro avogado, pero a xuíza dixo que xa era demasiado tarde, precisamente porque xa non estaban as testemuñas.
Máis tarde, a preguntas deste xornal, Beatriz Sestayo manifestou que a procuradora non lle notificou a convocatoria do xuízo.
A vista referíase a un roubo cometido en novembro do 2014 nunha jamonería do barrio de Ultramar, en Ferrol. Os ladróns fixeron un oco cunha maza na lúa do local, rebentaron a máquina rexistradora e o comecartos e fuxiron nun vehículo cun botín duns 3.600 euros.
A Fiscalía solicita para dúas deles dous anos e nove meses de prisión, pola aplicación da circunstancia agravante de reincidencia, mentres que para o terceiro pide a pena dun ano e nove meses de cárcere.
O acusado cuxa defensa está encomendada a Beatriz Sestayo pola quenda de oficio manifestou, a preguntas da xuíza, que nunca tivera contacto coa súa avogada.
Outro dos procesados mostrouse contrariado polo adiamento, porque, segundo dixo, viña coa pretensión de pechar o asunto dunha vez por todas a través dunha sentenza de conformidade.
Máis de 20 persoas entre policías, testemuñas e persoal xudicial
A suspensión do xuízo afectou a máis dunha vintena de persoas, incluídos dous presos que foron trasladados a Ferrol ex profeso dos penais da Lama e Teixeiro. Había un terceiro acusado, cinco policías nacionais -catro deles para custodiar aos presos-, cinco policías locais de Ferrol, tres testemuñas, dous avogados, a xuíza, o fiscal, a letrada de Xustiza e unha axente xudicial.