En tan só 24 horas as máximas descenderon ata 10 graos e o nordés favoreceu que a sensación térmica de frío fose intensa
29 abr 2017 . Actualizado ás 05:00 h.E n unha semana, o anticiclón, sen moverse do seu sitio, permitiu gozar dunhas condicións propias do verán, con temperaturas de 30 graos, e tamén nos obrigou a rescatar os abrigos do fondo do armario. A atmosfera é un quebracabezas complexo e caótico no que hai que prestar atención a todas as pezas. O martes pasado entrou en escena unha borrasca, situada ao norte de Europa, que axudou a crear, xunto ás altas presións, un corredor que canalizaba o aire polar ata Galicia. Chegou con algo de humidade, permitindo que na costa norte rexistrásense as primeiras choivas de abril, un mes que está a ser extremadamente seco. As precipitacións foron débiles, intermitentes e escasas, moi por baixo do que se necesita para saír da situación de prealerta por seca.
O aire polar provocou tamén un derrubamento das temperaturas. En tan só 24 horas as máximas descenderon ata 10 graos e o nordés favoreceu que a sensación térmica de frío fose intensa.
Pero o peor chegou de noite. Nunha situación de predominio anticiclónico, con aire polar e sen nubes, as mínimas caen en picado ata valores que poden acadar os 8 graos baixo, como ocorreu en zonas do interior. Cando o sol se pon, se o ceo está despexado, a calor que emite a Terra en forma de radiación infravermella escapa directamente cara ao espazo exterior. As altas presións producen ademais un estancamento do aire sobre o chan, que vai arrefriándose cada hora que pasa. Esta configuración xera tantas néboas matinais como intensas xeadas. A boa noticia é que esta fin de semana o anticiclón retírase cara ao oeste e permitirá que unha borrasca afecte a Galicia. A fronte asociada varrerá a comunidade deixando choivas xeneralizadas e os ventos do suroeste provocarán un notable ascenso das mínimas, impedindo a formación de xeadas.