Susana Díaz chama a recuperar a fraternidad do PSOE para poder transformar o país

É a súa primeira incursión en Galicia como precandidata á secretaría xeral do PSOE e Susana Díaz, presidenta da Junta de Andalucía, está a aproveitala para facer un chamamento incisivo a recuperar a unidade interna, e a «fraternidad» entre todos os socialistas, para poder levantar de novo o partido e transformar o país.

Díaz mantivo un encontro con militantes no Palexco da Coruña, ao que acudiron unhas 300 persoas, onde fixo un chamamento a que o partido non se cohiba ante a dereita do PP de Rajoy, de quen dixo que «non soubo xestionar a crise nin a posible recuperación», á vez que tamén resaltar que tampouco hai que cohibirse con Podemos e o seu líder, Pablo Iglesias , ao que acusou directamente de pretender interferir no proceso interno dos socialistas sacando un autobús para desprestixiar a historia do partido ou dicindo que queren parar a dereita cando despois fan todo o contrario e rexeitaron a un presidente socialista. «No PSOE deciden os socialistas», advertiu a Iglesias , antes de insistir en que «para dialogar hai que respectar».

Díaz foi presentada polo alcalde de Cariño e membros da agrupación socialista coruñesa, como Inés Rey , quen nun discurso aceso emprazou a Susana Díaz a romper «o teito de cristal e o de cemento» para converterse en secretaria xeral do PSOE. «Xa vai tocando», dixo, tras pór en valor o traballo de moitos líderes socialistas homes e reivindicar o traballo realizado na Coruña nos seis mandatos de Francisco Vázquez, que estaba sentado na sala e agradeceu o xesto.

Á entrada ao Palexco, Díaz foi abordada por un grupo de familiares das vítimas do sinistro ferroviario de Angrois para pedirlle á presidenta andaluza que demande ao PP a creación dunha comisión técnica independente, en liña coa petición expresada desde Bruxelas, en paralelo á constitución no Congreso dunha comisión de investigación para depurar as responsabilidades políticas.

---

---

---