Poden presentarse a toda a proba ou a unha parte, pero só se queren subir nota
27 abr 2017 . Actualizado ás 05:00 h.O Ministerio de Educación meteuse nunha lea este ano coa derrogación de facto da Lomce e non sabe como saír del. Por iso ideou unhas medidas extremas, que recibiron moitas críticas, para salvar o problema de miles de alumnos. Unha delas é a posibilidade de que uns 3.000 estudantes, só en Galicia, poidan acceder á universidade sen ter que pasar o exame de selectividade , aínda que só 1.500 son casos particulares deste ano: uns 1.000 son os repetidores de 2.º de bacharelato e 500 suspenderon o ano pasado a selectividade.
Eles cursaron o bacharelato da lei anterior, a LOE, que tiña un temario diferente ao da Lomce, e mesmo cambiaron as materias. Se se quixese seguir a machada a norma, en cada instituto e colexio de Galicia tería que haber aulas LOE para estes estudantes. E a CIUG tería que preparar dúas selectividades: a antiga PAU e a nova ABAU. Educación considerou inviable esta solución desde o punto de vista organizativo (hai centros cun ou dous repetidores nada máis) e CRUE Universidades Españolas decidiu que se non había tempo para duplicar os servizos habería que liberar aos alumnos ou o Goberno e a CRUE atoparíanse case seguro con demandas xudiciais das familia afectadas.
Así as cousas, permítese a este grupo de alumnos acceder á universidade sen selectividade. A iso súmanse os alumnos de FP, que xa non tiñan que realizar o exame antes.
Todos eles teñen catro opcións para facer un grao: usar só a súa nota media de bacharelato ou de FP (nunca sería superior a 10); presentarse ás dúas partes da ABAU; facelo só á parte obrigatoria (as tres linguas, Historia de España e a troncal de modalidade) ou á voluntaria, cunha, dúas, tres ou catro materias. Todo para subir nota. Estes son os colectivos afectados:
Repetidores
Uns mil. Os alumnos que fixeron 2.º de bacharelato no 2015-16 peros non aprobaron todo e este curso tiveron que repetir. Só teñen que matricularse das materias suspensas (no bacharelato permítese esta flexibilidade desde hai anos). Segundo datos do Ministerio de Educación, en Galicia repiten 2.º de bacharelato o 13,4 % dos alumnos que o cursan: o ano pasado foron uns 15.000, así que hai uns 2.000 repetidores. Con todo, as cifras que manexa a CIUG, pero que non son oficiais, fala duns 1.000 repetidores que van á selectividade.
Críticas. A CIUG, que se encarga de organizar a ABAU e o acceso á universidade, cre que é o mal menor. E lembra que non todos van ir á universidade, nin sequera todos van aprobar as materias pendentes. Ademais, comezaron o curso sen nin sequera poder matricularse, porque non sabían onde situalos, e ata marzo non souberon que podían presentarse á fase voluntaria da ABAU para subir nota. Se a iso se suma que ter repetido xa indica que as súas medias non adoitan ser altas, a competencia desleal é, din, mínima.
Suspensos de a PAU
Uns 500. É o alumnado que obtivo o título de bacharelato o curso pasado pero ou non se presentou á selectividade (PAU) ou non a aprobou. En setembro do ano pasado suspenderon a PAU uns 800 alumnos. Non todos van querer entrar na universidade, pois empezaron un ciclo de FP ou deixaron os seus estudos.
Non entran o que subiron nota. Neste grupo non entran os que se presentaron o ano pasado en setembro para subir nota. Teñen a selectividade aprobada
Formación profesional
Uns 1.500. Os datos do Ministerio de Educación publicados o ano pasado din que o 10 % dos alumnos que empezan un grao en España fano entrando desde a FP (desde hai anos estes alumnos teñen a mesma vía de entrada que os de bacharelato). En Galicia son uns 1.500 estudantes.
Sen cambios. Os alumnos de FP xa tiñan o sistema actual de ingreso: coa súa nota media ou podían presentarse ás materias específicas (que eles non cursaban no ciclo) para subir nota.
Bacharelato estranxeiro
Uns 100. Son un grupo mínimo e moi variable: normalmente, uns 40 veñen da UE e outros 50 ou 60 de terceiros países. É a UNED a que certifica o seu acceso á universidade.