Un 10 % da poboación son estranxeiros, pero na comunidade só o son o 3,2 %
02 may 2017 . Actualizado ás 15:04 h.Se algunha vez se lle quedou na cabeza a idea de que en Galicia viven 2,8 millóns de persoas, pódea ir esquecendo. Esa modesta cima acariñámola no 2010, pero desde entón imos en picado e xa só somos 2.707.700, e baixando. É o último dato do padrón continuo do Instituto Nacional de Estatística, que como todo o que ten que ver coa demografía depara poucas sorpresas: Galicia perdeu o ano pasado 10.825 habitantes, o que supón un 0,4 % do total.
En España a repartición acrecenta a fenda xa coñecida. Hai sete comunidades que gañan poboación e dez que a perden, con casos máis dramáticos que o galego, como Asturias e Estremadura, que baixan un 0,8 %, ou cifras absolutas máis impactantes, como os 23.124 veciños que se deixa Castela e León (-0,9 %) neste avance do padrón. A puxanza de Madrid, Cataluña e Baleares deixa o saldo negativo en todo o territorio nacional en 17.982 persoas.
Así, a poboación de España queda en 46,5 millóns -51 % de mulleres, 49 % de homes-, dos que 4,5 millóns son estranxeiros, isto é, un 9,8 % do total. Nesta cifra porcentual está unha das claves das áreas máis deprimidas de España, xa que en Galicia só hai un 3,2 % de foráneos, chan que só empeora Estremadura cun 2,9 %. As comunidades máis puxantes móvense todas nos dous díxitos, con Baleares á cabeza (16,7 %), aínda que en cifras absolutas a poboación foránea só aumenta en Cataluña, País Vasco e Madrid e no total de España a baixada é de 68.723 estranxeiros, unha gran maioría europeos.
Os estranxeiros achegan unha notable mocidade á envellecida pirámide de poboación española. Se se toman como referencia a nacionalidade e a idade, o 35 % dos españois atópanse no grupo de entre 16 e 44 anos; no caso dos estranxeiros, un 56 % están nesa franxa.
A idade media do conxunto dos habitantes de España é de 42,9 anos, pero se se volven ter en conta os lugares de nacemento a dos españois aumenta ata os 43,7 e a dos estranxeiros é de só 35,8 anos. Destes, os máis novos son os marroquís e os chineses (ao redor dos 30); e os maiores, os do Reino Unido e Alemaña, cunha media de 53 e 49 anos, respectivamente.
Seis concellos de Ourense perden doce concelleiros
Os concellos ourensáns de Baltar, A Merca, Oímbra, A Peroxa, Verea e Vilamarín perden tras as municipais dous concelleiros respectivamente ao caer a súa poboación por baixo dos limiares que marca a lei para a configuración das corporacións. O mesmo ocorreulle a Muxía , que baixa dos 5.000 veciños e pasará de elixir 13 edís a ter 11; Ribas de Sil, en Lugo, tiña 1.001 e queda en 992, así que se deixa outros dous edís e terá como máximo 7. En Pontevedra só cae Meis, de 5.006 a 4.844.
Cataluña, Madrid e Baleares son as que máis crecen
A poboación diminuíu en dez comunidades autónomas e aumentou no resto. Madrid (37.588), Cataluña (28.689) e Baleares (8.035) son as que experimentaron os maiores aumentos, e en Ceuta e Melilla gañaron 440 e 52 veciños respectivamente. En termos absolutos, as que máis veciños perderon no 2016 foron a Comunidade Valenciana (-24.958), Castela e León (-23.124) e Andalucía (-17.739). En relativos, Castela e León (-0,9 %), Estremadura e Asturias (-0,8 %) están peor que Galicia (-0,4 %).