A empresa barcelonesa Desokupa presume de ter chegado a acordos entre as dúas partes en oito de cada dez casos
20 abr 2017 . Actualizado ás 05:00 h.Así funciona Desokupa: «Veño para comunicarche que imos montar un control de acceso. Non poderedes entrar cando saiades. Ti es okupa e tes os teus dereitos, e eu dígoche que cando saias non poderás recuperar as túas pertenzas porque haberá un garda de seguridade 24, 48, 72 horas... Están aquí o propietario e o seu avogado, e viñeron co diñeiro. Mantémosche a oferta». A escena é só o comezo dun vídeo co que a propia empresa barcelonesa promociona os seus servizos, cun par de axentes de policía como testemuñas.
O que fala con solvencia e locuacidade é un dos mediadores da polémica firma nada en Barcelona e liderada por Daniel Esteve, que dirixe un impactante comando de boxeadores e expertos en artes marciais que conforman un persoal que non para de crecer na capital catalá e que, ademais doutra sede en Madrid, xa ten preparadas once franquías por toda España. Pronto entrarán en Galicia, garanten, porque recibiron «bastantes solicitudes», tanto de clientes que se interesan polos seus servizos como por empresarios que queren implantalos na comunidade.
Asegura o equipo de Esteve que, tras meses de actividade nos que non forzan a ninguén a abandonar as vivendas okupadas, senón que intermedian coas dúas partes, só lles notificaron un procedemento penal en fase de instrución o pasado 4 de abril, «sen ter constancia de quen o iniciou».
A policía, vixiante
As prácticas de Desokupa, que presume de ter chegado a acordos en oito de cada dez casos, foron censuradas por movementos sociais e pola propia alcaldesa de Barcelona, que ordenou á Policía Local vixiar que non existan coaccións por parte da empresa.
Recorrer a estes intermediarios, que aseguran que gravan todas as súas intervencións e que son eles os que chaman ás forzas de seguridade para que estean presentes, tampouco é barato. As tarifas dependen dos servizos e non teñen un prezo estándar, pero a media sitúase entre os 3.000 e os 8.000 euros, incluíndo un posible pacto económico cos okupas ou a presenza de gardas de seguridade.