Algúns dos voos para volver de Canarias, Barcelona, Milán, Lisboa, Roma, Londres e Dublín xa están completos
08 abr 2017 . Actualizado ás 08:17 h.Os meteorólogos non o queren asegurar ao cento por cento pero case. Saben que precisamente na primavera, os prognósticos poden cambiar radicalmente en apenas 24 horas e prefiren curarse en saúde á hora de dar unha predición a longo prazo. Aínda así, e a día de onte, o tempo estable está practicamente garantido para toda a semana. Mesmo se agardan temperaturas agradables, aínda que non tan elevadas como as desta fin de semana.
«Fai quince días viamos un descenso acusado de temperaturas, con frío, vento adverso e mesmo choiva. Mesmo hai tres días viamos baixas presións desprendéndose dos Azores. Hoxe, en cambio, hai unha situación estable para os días festivos de Semana Santa. Pode haber algún cambio radical pero a día de hoxe non o vemos. O máis probable é que sexan xornadas bastantes tranquilas. As temperaturas vanse a manter. Non se ve un descenso acusado», explica Alberto Romero , de Meteogalicia , como exemplo de como poden variar as previsións a longo prazo na primavera, unha estación xa de seu moi inestable.
O motivo de que persista o tempo seco e asollado en Galicia nos próximos días débese á presenza do anticiclón sobre as illas británicas «Está xusto amais da canle da Mancha. Ademais, ata o mércores observamos a presenza de aire cálido procedente de África. Isto non significa que a situación non vaia a continuar a partir do mércores. Creemos que si», puntualizou Romero , que aclara que pode haber nubes de evolución polas tardes en zonas do interior de Galicia con algún chuvasco tormentoso.
Prezos polas nubes
Con este panorama, a Semana Santa está feita para saír e gozar. Os que aínda estean a pensar a irse de vacacións, deben saber que na maioría dos casos, os prezos dos voos con saída dos aeroportos galegos seguen polas nubes. As tarifas aumentaron aínda máis que hai un mes -entre 10 e 165 euros-, cando xa entón custaban o dobre do normal. Tamén hai voos dalgunhas compañas que están xa completos, sobre todo, para o regreso do domingo ou do luns, en destinos como as Canarias e Barcelona. Existe o mesmo problema con algunhas compañas en destinos internacionais como Lisboa, Milán, Londres, Roma e Dublín. A pesar dos elevados prezos, tamén hai casos nos que as tarifas baixaron lixeiramente, pero seguen sendo elevadas se se compara con outras datas non tan solicitadas como nesta semana Santa.