Instancias superiores e outros xuíces han ir pechando casos abertos pola xuíza de Lugo contra políticos galegos
02 abr 2017 . Actualizado ás 05:00 h.O Tribunal Supremo e o Tribunal Superior de Xustiza deron carpetazo na última semana a dous asuntos iniciados desde Lugo pola xuíza Pilar de Lara e que mantiñan baixo investigación a destacados políticos galegos. Pero son máis os implicados pola instrutora da Pokémon, a Cóndor ou a Carioca que viron como outros xuíces e outras instancias hanos exonerado anos despois de ser postos baixo a sospeita da Xustiza.
Arquivo do Supremo
As botellas de viño. O eurodeputado socialista José Blanco e o senador do PP José Manuel Barreiro, ambos os lucenses, víronse liberados esta mesma semana da causa que De Lara enviou ao Supremo ao considerar que ambos os aforados poderían ter cometido suborno ao ser destinatarios en Nadal de caixas de botellas de viño de elevado valor enviadas polo presidente de Monbus , Raúl López. A parte do caso Cóndor que afectaba a Blanco e a Barreiro foi arquivada. O Supremo ve neses agasallos «actos de cortesía».
Arquivo do TSXG
Agasallos a Feijoo e Rueda . Tamén foi arquivada a causa dos agasallos a Feijoo e a Rueda polo mesmo empresario do transporte de viaxeiros. Neste caso foi o Tribunal Superior de Xustiza o que ordenou o peche do asunto no que incumbe ao presidente da Xunta e ao vicepresidente, porque os feitos «non son constitutivos de delito». A investigación era polo mesmo motivo: a recepción de caixas de viño en Nadal. A xuíza enviou por correo postal a súa exposición razoada cos indicios sobre os dous políticos nun sobre con rogo de entrega ao presidente do TSXG e coas inscricións «Secreto e confidencial».
Desimputado en Ferrol
A voz que non era de Rey Varela. Tiveron que pasar meses e varias probas periciais para que a propia xuíza eliminase calquera rastro de dúbida sobre José Manuel Rey Varela, actual conselleiro de Política Social, que era alcalde de Ferrol cando foi imputado por De Lara na operación Pokémon. A Rey Varela a xuíza atribuíalle ser o interlocutor nunhas conversacións gravadas co delegado de Vendex para a suposta entrega dun sobre con diñeiro. Ela mesma decretou o sobresemento. Quen falaba non era Rey Varela, senón outro militante do PP local.
Arquivo en Santiago
Paula Prado, libre. A deputada do PP, Paula Prado, foi investigada polo Tribunal Superior de Xustiza despois de que De Lara a implicase en ata seis delitos, entre eles tráfico de influencias e suborno, supostamente cometidos cando era concelleira en Santiago. O maxistrado do TSXG que a investigou non atopou delito algún en Paula Prado e ordenou o peche do sumario, que foi arquivado.
Arquivo en Ourense
Peza contra o exalcalde. O socialista Francisco Rodríguez quedou fóra dunha das pezas da Pokémon enviadas por De Lara a un xulgado de Ourense. Era unha adxudicación urbanístico e o xuíz ourensán que instruíu o caso ordenou o arquivo da peza ao non ver indicios de «infección criminal».
Arquivo na Coruña
O exedil Nogueira, sen delito. «Non chegou a acreditarse a perpetración de delito». Con ese argumento pechou unha xuíza da Coruña a investigación aberta por De Lara contra o exconcelleiro José Nogueira por unha obra no Acuario da cidade coruñesa.
Arquivo en Lugo
Orozco, exonerado. O xuíz de reforzo destinado ao xulgado que dirixe Pilar de Lara sobreseu esta mesma semana a peza separada da Pokémon na que se investigaba a Orozco polas obras da antiga fábrica da luz de Lugo. Sobre Orozco, o xuíz de reforzo di que «non se aprecia comportamento delituoso algún».