Só o 7 % dos concellos asinaron o programa de alugueiro de pisos baleiros
GALICIA
Os beneficiarios pagarán polo alugueiro entre 200 e 350 euros, segundo o municipio
23 oct 2016 . Actualizado ás 05:00 h.As 300.000 casas baleiras, as que ten Galicia na actualidade, son demasiadas. Sobre todo se se ten en conta a cantidade de galegos con dificultades para acceder a un fogar digno. É por iso polo que o Parlamento de Galicia aprobou en febreiro o Programa de Vivendas Baleiras, para garantir un teito a quen realmente o necesite. Oito meses despois, só 43 concellos da comunidade solicitaron adscribirse ao plan e apenas 23 asinaron a adhesión. Os beneficiarios desta bolsa de pisos serán afectados por procedementos de execución hipotecaria, desafiuzados por falta de pagamento, familias numerosas, monoparentais ou mulleres vítimas de violencia machista. O período máximo de alugueiro é de 36 meses.
Das sete cidades, só Santiago e Ourense asinaron o acordo, mentres que Lugo está en proceso e A Coruña, que aprobara nun pleno asínaa grazas ao apoio do PSOE e o PP, finalmente botouse para atrás porque considera a iniciativa «unha perda de axilidade de xestión dos inmobles e de soberanía municipal no parque de vivenda propio».
Este programa, segundo Infraestruturas e Vivenda, ademais de fomentar o acceso a pisos protexidos, establece medidas que achegan seguridade xurídica ao mercado e garantías a adquirientes e usuarias. En aras de que todo vaia como unha seda, a Xunta cubrirá o seguro multirriesgo do fogar e outro de garantía de cobro para os propietarios.
En canto ao alugueiro máximo, dependerá do tipo de concello. Na Coruña, Santiago, Vigo, Ourense e Pontevedra o alugueiro non poderá superar os 350 euros; en Ferrol, Lugo, Verín, Cangas ou Betanzos o tope son 250; e en municipios máis pequenos poden pedir un máximo de 200 euros.
Desde o Instituto Galego de Vivenda e Solo (IGVS), que xunto á Federación Galega de Municipios e Provincias (Fegamp) deu forma ao programa, explican que os concellos que asinen proporán a incorporación de vivendas «da súa propiedade ou de terceiros, sempre que estean libres de cargas e gravames que impidan o seu arrendamento [...], estean desocupadas e sexan susceptibles de uso».
Nos últimos anos produciuse unha acumulación de vivendas en mans das entidades de crédito, polo que é preciso dispor de información fiable en concellos de máis de 10.000 habitantes de que poidan ser habitables. «A limitación a concellos de máis de 10.000 habitantes está fundamentada nos datos de peticións do Rexistro Único de Demandantes de Vivenda de Galicia, que acreditan que son os que teñen unha maior demanda».
A comunidade é a que ten unha maior porcentaxe de vivendas sen ocupar con respecto ao total de vivendas por comunidades autónomas: un 18 %. Ante esta situación e tendo a loita contra os desafiuzamentos por bandeira, a conselleira de Infraestruturas e Vivenda, Ethel Vázquez, cargou contra Ferrol e A Coruña porque «rexeitasen e non apoiasen» este programa, e culpou a Vigo por «telas» e non pólas a disposición de familias que as necesitan, nun concello no que «mesmo vimos folgas de fame». A Valedora do Pobo advertiu de que colgará na web institucional o rexeitamento municipal de Vigo.
Ourense, A Coruña e Lugo, afectadas
O censo do 2011 do INE deixou patente que, en Galicia, a euforia polo ladrillo tivo consecuencias máis acusadas que na maioría das comunidades. Das quince provincias con maior porcentaxe de vivendas baleiras, tres son galegas. Pero non só iso, Ourense e Lugo son as que se sitúan á cabeza: 23 % de casas desocupadas en Ourense e 20 % en Lugo.