O fillastro de Oubiña solicita o indulto e atrasa a poxa das súas propiedades

Perder un patrimonio valorado en millón e medio de euros e ter que desembolsar outro millón en multas non é un grolo de bo gusto para ninguén, e David Pérez Lago, o fillastro de Laureano Oubiña, está a utilizar todos os medios ao seu alcance para impedilo. Unha sentenza asinada pola sección cuarta da Audiencia Provincial de Pontevedra en febreiro do 2015 daba por sentado que o fillo da falecida Esther Lago enriqueceuse co narcotráfico e creara, xunto cos seus parentes e achegados, unha rede de branqueo para ocultar en empresas pantasma e propiedades os beneficios obtidos deses ilegais negocios. A pena para o arousán era dunha multa dun millón de euros, así como o comiso dun chalé en Aguete (Marín) valorado en 400.000 euros e doutro na luxosa urbanización de Las Rozas (Madrid) taxado nun millón de euros. A sentenza condenaba tamén, entre outros, á súa exmuller, Ana Isabel Briz, e á súa sogra, que seguen vivindo na actualidade na mansión madrileña.

Polo visto, Pérez Lago non está de acordo coa sentenza, porque recentemente solicitou ante o Goberno que se lle indultase. E non é a primeira vez que o fillastro de Oubiña trata de atrasar a execución do fallo xudicial. Uns meses despois de que se asinase, o condenado xa presentou un recurso alegando un defecto de forma que non prosperou. Agora, a vía que queda é a do indulto, unha estratagema utilizada no pasado por outros narcos galegos e que moitas veces deu os seus froitos, ás veces cunha exculpación total do condenado e outras con rebaixas parciais da pena inicial. 

Acordo coa Fiscalía

Pero o máis curioso no caso de David Pérez Lago é que trate de revogar unha condena que el mesmo aceptou; porque a vista celebrada en febreiro do 2015 na Audiencia de Pontevedra por branqueo de diñeiro foi moi breve, dado que o principal inculpado chegou a un acordo coa Fiscalía Antidroga polo que aceptaba os tres anos de prisión e o comiso dos bens embargados, que ademais das dúas mansións en Marín e Madrid, incluía no lote varias leiras e unha nave comercial. Pouco despois de asinar o acordo e de que se ditase sentenza, xa tratou de revogala mediante a presentación dun recurso. Ao non prosperar, bota agora man do indulto.

O asunto queda, pois, á espera de que se pronuncie o Consello de Ministros. En contra das pretensións de Pérez Lago xoga que xa ten dúas sentenzas firmes por narcotráfico -una do 2001 de nove anos e un día de prisión por tráfico de drogas e outra do 2006 de seis anos de cárcere por un delito similar-. Pero é que ademais, se hai anos os indultos eran case un trámite ordinario no Consello de Ministros, que asinaba máis de cincocentos ao ano, na actualidade xa non se amnistía coa mesma alegría; de feito, o 2015 saldouse con 75 medidas de graza, a cifra máis baixa desde o ano 1996.

De rexeitarse o indulto, as propiedades de David Pérez Lago pasarían a formar parte do Fondo de bens comisados por tráfico de drogas, que logo as poxaría como fixo antes con outros bens do clan nado ao amparo do matrimonio Oubiña-Lago.

A medida de graza beneficiou a 143 narcos galegos nos últimos vinte anos

Solicitar o perdón do Goberno foi unha maña empregada a miúdo por narcos galegos que trataban de obter do Poder Executivo o que non lograran do Xudicial. De feito, en vinte anos asináronse 143 indultos que beneficiaron aos clans galegos.

En xeral, case todos os aprobados facían referencia a penas que non superaban os catro anos de prisión e que quedaban reducidas á metade coa condición de que o condenado non volvese cometer un delito similar nun espazo de tempo que habitualmente coincidía, precisamente, coa duración da condena.

Pero tamén houbo nomes famosos que se beneficiaron desa medida de graza. Como Daniel Baúlo, o fillo maior do Caneo, que perdeu a vida nun axuste de contas. Ao primoxénito do clan rebaixóuselle parcialmente unha condena por colaborar coa Xustiza, xa que delatara aos Charlines, a quen acusaba de estar detrás do crime que acabara coa vida do seu pai e prostrado nunha cadeira de rodas á súa nai. Ou como Manuel Vázquez, o Piturro, que foi indultado no seu día por ter delatado ao exsecretario da Cámara de Comercio de Vilagarcía, Pablo Vioque, como organizador dun alixo no que el tamén se inculpou.

O certo é que, aínda que a medida de graza adoita pór como condición que non se reincida no delito, tanto Baúlo como Vázquez foron detidos posteriormente por tráfico de drogas.

---

---

---