Na súa memoria do 2014, o Tribunal Superior demanda oito prazas de maxistrados para reforzar os xulgados e salas da Coruña, Vigo, Ferrol e Lugo
09 ago 2015 . Actualizado ás 05:00 h.A lentitude da xustiza. Unha frase que, quen máis e quen menos, repetiu ata a saciedade. O tempo corre e nos cuartos habilitados para almacenar, os centos de casos que chegan aos xulgados galegos acumúlanse día a día. É unha imaxe que vén repetíndose desde hai xa varios anos. Ficheiros desordenados, ás veces ata tirados polo chan, levando ao límite a capacidade de almacenaxe destes pequenos habitáculos. É a denominada e, en parte, descoñecida, crise xudicial. E da que o Tribunal Superior de Xustiza de Galicia volve facer mención na súa memoria da actividade xudicial do ano 2014. Conscientes da situación pola que atravesa a xustiza, no seu escrito, fan referencia tanto ás deficiencias internas das salas e xulgados como á ausencia dos mesmos.
A Coruña e Vigo son as cidades galegas para as que o TSXG reclama máis órganos xudiciais, así como unha maior oferta de postos de traballo para reforzar o persoal e facer fronte aos casos e demandas que presentan os cidadáns.
Por unha banda, na provincia coruñesa requiren unha praza para a Sala Social do Tribunal Superior de Xustiza, un Xulgado do Social e outro do Mercantil, ademais dun xulgado de primeira instancia especializado en dereito de familia con sede en Ferrol. O CSI-F, sindicato de funcionarios independentes, tamén se pronunciou con respecto ás necesidades da xustiza. Reclaman, como mínimo, outro equipo psicosocial debido ao «elevadísimo volume de traballo e o atraso na emisión dos informes».
En cambio, para Vigo, o TSXG demanda unha praza para a Sección número 6 da Audiencia Provincial e dous xulgados, un especializado en dereito de familia e outro do Social. Para Lugo reclaman unha praza na Sección primeira, con competencia civil, da Audiencia Provincial. Ourense, con todo, é a única provincia para a que o TSXG non propón novos órganos xudiciais. Actualmente, Galicia conta con 350 xuíces e maxistrados repartidos nas salas Civil, Penal, Contencioso-Administrativo, Social e Militar e outros 15 que actúan como reforzo.
Melloras internas nas salas
Aínda coas Salas e os Xulgados que hai, o Tribunal Superior de Xustiza ve deficiencias tecnolóxicas e físicas en canto á dotación e capacidade dos mesmos. O proceso de dixitalización e modernización dos escritos dos cidadáns, aínda que xa chegou a moitas salas e xulgados da comunidade, si é certo que tampouco se puido culminar todo o amplo abano de expedientes xudiciais. Unha tarefa aínda pendente para as salas e xulgados de toda Galicia e que o sindicato CSI-F tamén cualifica de «urxente» para «axilizar e mellorar o funcionamento da administración de xustiza».
A seguridade é outro dos temas que máis preocupa ao TSXG. No seu informe piden unha maior dotación de persoal de seguridade nos centros xudiciais da Coruña e Vigo, as dúas cidades onde se rexistraron «máis incidentes». A maiores, tamén piden que se instalen en todas as Salas de vistas dos Xulgados e Tribunais de Galicia «o sistema de gravación dixital con firma electrónica», o denominado sistema e-Fidelius.
Esixe, ademais, unha serie de condicións para ter un mellor ambiente laboral, como que a cobertura das prazas vacantes e das baixas por enfermidade se
produza de forma automática, «sen solución de continuidade», e que o persoal interino se forme cos mecanismos mínimos e necesarios, como «un curso acelerado sobre a aplicación informática que se vai manexar».
Para rematar, e de cara a un futuro, pretenden ampliar os servizos comúns de actos de comunicación e execución da Coruña a todos os órganos xurisdiccionais da provincia para, así, «homoxeneizar estas actuacións».
O equipo de tradución actual acumula queixas nas vistas de xuízos penais
O TSXG déixao claro na súa memoria do 2014. Leva repetindo «ata a saciedade» a necesidade de aumentar as competencias do equipo de tradución, asumindo a tradución de, polo menos, os idiomas portugués, francés, inglés e alemán ao galego e ao castelán, e viceversa, debido a «a gran cantidade de peticións de cooperación xudicial internacional que se realizan». Ademais, sinalan que a empresa contratada actualmente pola Xunta, encargada dos labores de tradución dos escritos, recibiu «un elevado número de queixas», sendo as máis numerosas as relacionadas coa interpretación nas vistas de xuízos penais.
Esta demanda obedece ao incremento no número de traducións que o gabinete realiza para todas as salas de Galicia. Son cinco persoas que traducen de castelán a galego e viceversa todas as resolucións dos tribunais galegos. Ademais, dada a gran cantidade de informes que chegan cada día aos xulgados, o TSXG tamén insiste no aumento do número de prazas de peritos especializados, máis concretamente, os dedicados á peritaxe da caligrafía e ao de inmobles. Actualmente, estes dous postos de traballo só contan cunha persoa en cada un dos cargos.
O TSXG considera esencial aumentar o número de prazas para rematar coa incesante subida de informes acumulados. Desde o ano 2011, onde se contabilizou un único informe pendente, o ano pasado rexistráronse un total de 79 informes en lista de espera.