O complexo, onde tamén se celebran vodas, despide a mellor campaña do ano, coas viaxes de fin de curso
24 jun 2017 . Actualizado ás 11:09 h.Case nada supera, para un neno de cinco ou seis anos, a experiencia de montar nun pónei, ver corretear uns coellos, equiparse cun traxe de apicultor ou amasar o seu propio pan. Os alumnos de 3º de Infantil do colexio coruñés Fomento Montespiño mergulláronse onte nestas e outras aventuras no parque temático de Aldea Nova. Escolares de toda Galicia descobren o mundo rural no complexo situado en Sedes, que despide agora os meses de maior actividade do ano, coincidindo coas excursións de fin de curso, pero continúa aberto todo o verán cos mesmos talleres e actividades.
«Os profesores escollen o que queren facer e van rotando aos nenos para que todos participen en todo, cos cabalos, o horto, a elaboración do pan, o resto dos animais, o apiario, o taller de astronomía no planetario, o de cultura castrexa ou casa-museo, onde ven como se vivía antigamente nas casas de labranza», conta María Beceiro, coordinadora do centro. Os colexiais coruñeses dixeron adeus ao ciclo de educación infantil subidos ao pónei, probando o mel que as abellas fabrican no apiario de Aldea Nova e embadurnándose a cara con fariña, en plena faena para cocer os seus propios bolos de pan. «Pasáronllo fenomenal e participaron en todas as actividades», comentaba unha profesora. De feito, o colexio xa organizara unha expedición ao parque temático de Sedes o ano pasado, «para achegar aos nenos da cidade ao mundo agrícola».
Para os menores, a xornada foi unha auténtica viaxe iniciático, que lles conduciu a través da granxa -onde conviven unha vaca de raza cachena, varias ovellas galegas, unha porca celta, unha burra, cabras, galos, galiñas, pavos ou patos, xunto ao cabalo ou o pónei. «Triunfan todos os animais, encántanlles», recoñece a encargada de organizar as visitas, atendidas por entre cinco e dez monitores, en función da idade e o número de nenos.
Moi boa nota
Nas enquisas de valoración que cobren os docentes ao finalizar cada excursión, a nota media achégase ao sobresaliente. Nos rostros dos escolares percíbese a satisfacción, non só por un día lonxe das aulas e o inicio das vacacións do verán, senón pola novidade. Aos adultos tamén lles sorprende Aldea Nova. De feito, hoxe celébrase no complexo unha voda, e xa van dúas. «Os primeiros buscaban un sitio rústico, viñeron e, aínda que coincidiu un día de choiva, encantoulles e decidiron casar aquí», relata Beceiro. O banquete desenvolveuse na cuberta do albergue, preparado e servido por unha empresa de cátering que contrataron os noivos. A segunda parella que elixe este lugar de Narón para contraer matrimonio optou polo día de San Xoán.