Vinte e un estudantes integran a comañía Ópera Bombiglobo que chega esta tarde ao Jofre
20 jun 2017 . Actualizado ás 05:00 h.Hoxe Teatro Jofre (Ferrol) • 19.00 horas • Irene Águeda Orroyo, Antia López, Mateo Couce, Hugo Balado e Roi Picos dan vida aos protagonistas da ópera De camiño á realidade que se pode ver esta tarde no Teatro Jofre de Ferrol. Podería tratarse dunha cita máis da programación do espazo cultural de non ser porque estes artistas teñen entre 10 e 11 anos.
Trátase dos alumnos de quinto de primaria do Cpi San Sadurniño, que forma parte do proxecto LÓVA (A Ópera Vehículo de Aprendizaxe). Así, os 21 alumnos constituíron a súa propia compaña, Ópera Bombiglobo, na que cada un desempeña o seu propio rol. «Cando acabamos de formar a compaña fixemos un sorteo de profesións», explican Laura Rodríguez e Carme Casal, encargadas das relacións públicas.
Irene Galdo e Iago Castro encargáronse da escritura do guion dunha historia para a que o grupo se inspirou en problemas que poden darse entre os rapaces da súa idade e a tese de «sentirse aceptado». «A historia ten a cinco protagonistas dos cales catro teñen móbil e un non. Por non telo danlle de lado e séntese o raro, invisible», explican as responsables de comunicación da compaña. A dirección corre a cargo de Adrián Pico, como responsable de escena, e Mario Varela, como de produción.
A ópera trátase dunha abertura con tres escenas coas composicións Xogos Inútiles, Estou Aqui, What Makes You Beautiful, Queremos Cargadores e A Realidade Máis Real.
Se xa de seu ten un enorme mérito que os pequenos se embarquen nesta aventura de escribir, dirixir e interpretar a súa propia obra, non lles pareceu pouco e eles mesmos encargáronse de todo o que rodea a unha gran produción. Mateo Galdo e Erik Santos, por exemplo, asumiron o labor de caracterización dos intérpretes; Uxía Calvo, Sergio Italia e Adrián Alves traballaron no deseño e elaboración da escenografía; e Sol de Lera, Jesús Penedo e Iván Roca compuxeron a música. Para todo isto contaron co indispensable traballo dos documentalistas Adrián Bouzas e Hugo Pita.
Fin de xira
A actuación desta tarde porá o broche de ouro a unha xira que empezaron na Casa dá Cultura de San Sadurniño. Tamén lles levou ao Teatro Real de Madrid onde interpretaron parte da ópera nunha gala de LÓVA. «Estamos nerviosos e ilusionados. Van vir as nosas familias e amigos», destacaron as integrantes.