Impulso ao Xeoparque do Cabo Ortegal

ana f. cuba ORTIGUEIRA / LA VOZ

CERDIDO

Tras visitar Mutriku, Deba e Zumaia, os alcaldes ven viable o proxecto, adaptando o modelo de xestión da costa vasca

09 mares 2017 . Actualizado ás 05:00 h.

Todos os alcaldes dos concellos implicados no proxecto do Xeoparque do Cabo Ortegal, salvo o de Valdoviño, edís e algún técnico percorreron durante un par de días os municipios guipuscoanos de Mutriku, Deba e Zumaia, que conforman o Geoparque da Costa Vasca. Os responsables municipais de Cedeira, Cerdido, Cariño, Ortigueira, Moeche e San Sadurniño regresaron convencidos da viabilidade do proxecto, adaptando o modelo de xestión vasco

Que se atoparon os rexedores durante a súa viaxe a Euskadi?

O Geoparque da Costa Vasca entrou a formar parte da Rede Europea e Global de Geoparques en 2010 e en 2015 foi declarado Geoparque Mundial da Unesco, polo que levan varios anos traballando. Abarca os municipios de Mutriku, Deba e Zumaia e está xestionado pola Asociación Geogarapen, formada polos tres concellos (socios fundadores), o Goberno Vasco, a Deputación Foral de Guipúzcoa, entidades comarcais, a Sociedade de Ciencias Aranzadi e Unesco Etxea. Desenvolven actividades no campo da ciencia, a divulgación, o geoturismo, a educación ambiental ou o desenvolvemento local, e contan coa implicación do sector privado. De feito, os empresarios turísticos foron os máis beneficiados, de forma directa, desde o recoñecemento do geoparque. Tamén se creou a entidade de Amigos do Geoparque, como un elemento para reforzar a cohesión entre todos os axentes que operan neste territorio. O financiamento corre a cargo dos concellos, subvencións doutras administracións e os fondos obtidos polas visitas guiadas e outros produtos.

Variou a súa visión do proxecto do Xeoparque do Cabo Ortegal?

A experiencia destes días avivou o entusiasmo dos alcaldes polo proxecto, do que empezou a falar publicamente hai uns anos o xeólogo Francisco Canosa. «Fai falta xenerosidade por parte de todos e estamos convencidos de poder facelo (...). O cambio que produciu alí no territorio foi tremendo, cun novo modelo de desenvolvemento da comarca, sostible», destacou o cariñés José M. A. Pumar. «Vexo que hai que cambiar a mentalidade, traballar en conxunto, sumando forzas. Os tres alicerces son o espazo [os recursos], o plan de desenvolvemento e as persoas que vas implicar», recalcou o ortegano Juan P. Muras. «Debemos facelo, nós apoiaremos en todo o que poidamos, é un tema de longo percorrido, cunha repercusión económica importante», apuntou o edil de San Sadurniño Manolo Varela. «Animáronnos moito e véxoo moi viable», subliña Benigno Galego (Cerdido). «Pode ser un antes e un despois a nivel turístico, temos cantidade de recursos, só hai que ensinalos, protexelos e coidalos», resume Pablo Moreda (Cedeira). «Todos temos moito que poñer e moito que gañar, imos ter que traballar xenerosamente, require un grao de coordinación moi grande», abunda Beatriz Bascoy (Moeche). Todos coinciden na necesidade de implicar á sociedade e a súa identificación co proxecto.

Cales son os próximos pasos a dar na zona?

Os alcaldes convocarán unha reunión para perfilar os seguintes pasos, á espera de que a Deputación aprobe o novo plan de Patrimonio, ao que optarán para financiar o arranque do proxecto. Pumar explica o calendario orientativo que tiveron pensado na costa vasca, onde se brindaron a colaborar: «En xaneiro de 2018, solicitar á Unesco, cunha carta, a nosa intención de empezar a ser guiados ou tutelados (...). Necesitamos un ano para traballar con filosofía de geoparque, aínda sen selo. E en xaneiro de 2019 presentariamos a candidatura formal». A primeira actuación consistiría en elaborar un inventario dos puntos de interese xeolóxico, aínda que xa existe un catálogo feito por Canosa.