Falamos máis da calidade de House of Cards, Better call Saul ou Westworld que do éxito dalgunhas series dirixidas a outros públicos. Distintas listas indican que, en realidade, son outras as que reinan en Internet e suman máis seguidores. ?
23 abr 2017 . Actualizado ás 05:00 h.En éraa das redes sociais, ata as series de televisión viven pendentes de Internet. Que a audiencia oficial dun programa mídese como toda a vida, si, pero unha cousa é o share e outra o empurre que os seguidores poden dar a unha serie a través das redes. Xerar ruído, movemento, comentarios, interaccións, sumar trending topics e seguidores pode ser a clave para que ninguén (nin sequera a produtora) esqueza de que unha serie está moi viva, digan o que digan as cifras oficiais.
Sábeno ben en Voz Audiovisual: Serramoura, a serie que produce para Televisión de Galicia, segue sendo líder nas noites dos domingos. Pero, ademais, está a conseguir que unha chea de serramourers (que así se chaman os seguidores da serie nas redes) non paren de comentar cada capítulo. De feito, a morte da sarxento Neira hai unhas semanas levantou á serie galega á lista de trending topics nacionais en Twitter.
Bo termómetro
Segundo Hadrián Rodríguez, do departamento de desenvolvemento de Voz Audiovisual, as redes son «un escenario un pouco irreal para ver a influencia dunha serie, porque hai movementos que logo non se traducen en audiencia. Pero si é un bo indicador para ver a súa saúde: canto máis se comente, mellor vai», apunta. E é que se un capítulo xera moito movemento, aínda que logo non teña tanta audiencia, «fomenta o boca a boca, é unha ferramenta de promoción», di Rodríguez.
Viuse hai unhas semanas coa tráxica morte dun dos personaxes máis queridos da serie, a sarxento Marga Neira, que interpretaba a actriz Lucía Regueiro. En Twitter, os chíos de Serramoura conseguiron 95.000 impresións (a suma do chío orixinal máis as respostas e os retuits) en tres días. E en Facebook, os seguidores da serie deixaron centos de comentarios.
Pero estas opinións que os espectadores van deixando mentres ven as series, teñen algún efecto? O ritmo de produción impídeo, aínda que si que deixan un pouso. Como di Hadrián Rodríguez, «aínda que é complicado introducir nos guións suxestións ou correccións, si se fan chiscadelas. Por exemplo, sabemos que o personaxe de Peixe xera moitas conversacións. Pois cando se lle bota de menos, vemos como se lle pode dar paso».
As redes como salvación
Para outras series, a presión dos seguidores nas redes sociais viuse mesmo como unha táboa de salvación. É o caso do ministerio do tempo. Bendicida pola crítica, pero cuns datos de audiencia máis ben discretos, cada capítulo da serie era celebrado por unha avalancha de comentarios en Internet. Os ministéricos, seguidores da serie nas redes, son parte da explicación de por que TVE decidiu apostar por unha segunda tempada. E ata se coaron nalgún capítulo como extras.
E que ocorre coas grandes series internacionais? As distintas listas que elaboran empresas de análises de redes indican que non son quizais os produtos máis encomiados os que xeran máis movemento en redes. A empresa ListenFirst Media, que cada ano elabora un ránking de series máis comentadas nas redes sociais, situou Pequenas mentireiras como a que máis comentarios movía o pasado ano, con máis de 256,75 millóns de interaccións en Instagram, Facebook, Twitter, Pinterest e Tumblr. Séguelle The Walking Dead, con 144,86 millóns, e Teen Wolf, con 70,55 millóns. Moito máis lonxe quedan éxitos como Xogo de tronos, que só xerou 39,66 millóns de comentarios. En canto ás estreas do pasado ano, a serie máis comentada foi Cazadores de sombras, seguida pola exitosa Stranger Things.
Outra lista, a de MVPIndex, sitúa entre os dez programas con máis mencións a catro series: de novo, The Walking Dead, Xogo de tronos e Pequenas mentireiras, ás que se suma todo un clásico, Anatomía de Grey.