En febreiro Galicia pide cocido

M. Otero, Bea Abelairas, Toni Longueira

SABE BEN

Marta Carballo / Nacho L. Tella

É o prato no que todos pensan cando os entroidos se achegan para pintar de cor (e sabor) o calendario. O cocido galego garda a esencia de séculos de tradición e o segredo do seu sabor escóndese no máis profundo da terra.

05 feb 2017 . Actualizado ás 16:38 h.

Lalín é a patria do cocido galego. Desde hai case dúas décadas a mediados de xaneiro iníciase o mes dedicado a este prato tradicional, que este ano comezou o 15 de xaneiro e estenderase ata o 14 de febreiro. Xa o di o devandito: «de San Amaro a San Valentín, mes do cocido en Lalín». 27 restaurantes da capital dezana ofrecen en total 4.075 prazas para saciar a fame de cocido cun prezo medio por comensal de 26 euros.

O prato máis representativo do entroido galego leva na súa esencia séculos de historia, desde a súa orixe, que algúns expertos relacionan coa adafina dos xudeus, un cocido a base de garavanzos e carne de cordeiro cociñada en pota de barro. Isto foi alá polo século X antes de Cristo. Pero o porco chegou para revolucionar a alimentación e a vida galega e transformou o prato por completo. É a base do cocido, o ingrediente principal.

O segredo do cocido, está, sin duda, na calidade dos seus ingredientes, criados e cultivados na mellor terra. O lacón e os chourizos, como ben saben en Lalín, son a esencia do prato. O primeiro xa se coñecía no ano 1619, e na actualidade é a zona de Lugo a que ten fama de producir o mellor lacón, e as principais empresas pertencentes á Indicación Xeográfica Protexida están inscritas nesta provincia.

miguel souto

Pero non só de lacón vive o cocido, do porco tamén debe levar un bo chourizo galego (magro de porco, touciño, pemento doce e picante, allo e sal; afumado e secado para conservar en graxa ou aceite), a costela e a tradicional cachola.

A tenreira galega, imprescindible nesta receita, ten carné de calidade propio avalado por máis de 3.700 anos de historia de produción deste tipo de carne na comunidade. A parte máis utilizada neste caso é o jarrete, situada na parte de debaixo das patas, xa que é unha carne melosa, con moita fibra e moi rica en coláxeno.

E se falamos de patacas, a zona de Carballo é unha das principais produtoras do tubérculo ideal para engadir ao cocido, que sempre se acompañará cos grelos, unha verdura que ten os seus produtores máis destacados na zona de Monfero e nas Pontes. sen desmerecer ao de Santiago.

Veña de onde veña, se o produto ten selo galego de calidade o éxito do cocido está garantido.