Alí onde o océano se remansa ao abrigo do Dique de Abrigo adquire toda a súa expresión o mellor produto do mar galego, servido con elegancia desde maio pasado no restaurante Comarea
10 mares 2016 . Actualizado ás 10:30 h.O local, que goza de inigualables vistas á ría -non hai moitos así na cidade-, especializouse en peixe e marisco da lonxa, que comparten protagonismo cos arroces, moi solicitados.
Que ninguén busque aquí rock and roll gastronómico. Comarea é un magnífico restaurante de produto no que a robaliza, a pescada, o peixe sapo, a raia ou o abadexo prepáranse «basicamente á prancha, ao forno ou en caldeirada», explica o xerente, Anxo Quintáns, que comparte protagonismo no restaurante co cociñeiro, Bieito Rodríguez. Os propietarios son Manuel Alvite e Jesús Quintáns, que rexentan tamén un coñecido local de racións en Mato Grande.
Entre as excelencias con que agasallan aos visitantes -turistas en moitos casos- xunto ao Dique de Abrigo cóntanse tamén o polbo á feira e as luras Comarea, encebolados. A robaliza da ría é imbatible en calquera preparación, e a oferta complétase cunha carta variada de sobremesas caseiras, co flan e o tiramisú como reclamos, e cunha adega de catrocentas referencias, galegas en moitos casos. Un sistema de apertura do teito converte en terraza parte do restaurante, que ten zona de picoteo, máis informal, na planta baixa.