Miles de transportistas notifican que reclamarán polo sobrecusto dos vehículos
12 jul 2017 . Actualizado ás 05:00 h.Boa parte dos transportistas galegos que adquiriron camións Iveco, DAF, Daimler-Mercedes , Volvo-Renault ou Man entre os anos 1997 e o 2011 puxéronse en mans de avogados para reclamar ás marcas o que pagaron de máis polos vehículos. Eses fabricantes conformaron durante ese tempo un cartel que pactou os prezos de venda para engordalos e gañar máis diñeiro. A Comisión Europea destapou a trama hai un ano e multou ás compañas con 3.000 millóns. Ese expediente abriu a porta a reclamar para os que adquiriron os vehículos. E niso están os profesionais ou, máis ben, os seus avogados.
Por mor da investigación de Bruxelas, as marcas admitiron os acordos, pero agora que lles empezan a chegar as notificacións legais que esixen as compensacións tratan de escurrir o vulto. Así o desvela Ignacio Caruncho, do despacho de avogados que leva o seu nome máis os de Tomei e Judel. Este bufete representa os intereses dos asociados á federación galega Fetram. No seu nome remitiu aos fabricantes ao redor dun milleiro de reclamacións (unha por camión) dunhas 300 empresas e recibiu contestación xa a algunhas delas. «Recoñecen os feitos, piden desculpas, pero aseguran que non se produciu dano algún e néganse a compensar», resume Caruncho.
A pesar desas negativas, a pelexa non fixo máis que empezar. Antes de recorrer á vía xudicial, polo menos este despacho intentará primeiro acadar pactos amigables cos fabricantes, aínda que con poucas esperanzas de éxito. «Enfrontámonos a grandes multinacionais que utilizarán todos os medios posibles para non pagar», reflexionou Caruncho.
Non o fará así o bufete galego CCS (Caamaño, Concheiro e Seoane). «Presentaremos as demandas xudiciais canto antes, non vai haber intentos de acordos previos», subliñou o avogado Miguel Caamaño. CCS representa ao maior colectivo de afectados de España, agrupado ao redor da Confederación Española de Transporte de Mercancías (CETM). Dentro dela está a federación galega Fegatramer.
A CETM estima que son máis de 150.000 os transportistas españois que adquiriron vehículos e que agora poden demandar para recuperar o pago de máis: 2.500 millóns, sen sumar os intereses de demora derivados. No caso de Galicia, cifra nuns 20.000 os potenciais afectados e nuns 150 millóns o sobrecusto abonado.
Miguel Caamaño avanzou que, a nivel nacional, ata o momento remitiron aos fabricantes de camións uns 3.000 requirimentos nos que comunican que reclamarán xudicialmente.
Da terceira federación galega de transportistas, Fegatrans, hai, de momento, 350 reclamantes, e 900 vehículos, aínda que son cifras provisionais. Alberto Vila, coordinador desa federación, estima que a final de ano acadarán o medio milleiro de requirimentos.
De prazo ata o 2018
En Galicia, só o 35 % dos 7.000 transportistas están nalgunha destas federacións. O resto terán contratado a asesoría legal pola súa conta. O despacho do avogado lucense Carlos do Pino é un dos que representan a algún destes profesionais e prepara toda a documentación para enviar as reclamacións aos fabricantes. Primeiro intentarano pola vía amigable e, se non funciona, pola xudicial. Como o resto. Pero a diferenza doutros despachos, Do Pino xoga coa data do 8 de abril do 2018 como límite para reclamar aos fabricantes. É entón cando se cumpre un ano desde que se fixo oficial a sanción da Comisión Europea. Outros bufetes anuncian como tope o próximo día 19, que é cando se anunciou publicamente a sanción.