Balearia e Armas, clientas históricas do sector, adxudican ferris en Italia e Australia
11 may 2017 . Actualizado ás 05:00 h.O sector naval galego é un sufridor nato que non gaña para desgustos. Saíu vivo de dúas reconversións, da ameaza asiática, do veto da Unión Europa (crise do tax lease) e do derrubamento do sector off shore (unha das súas especialidades) porque xa ninguén constrúe buques para buscar petróleo.
E agora que a caída do prezo do combustible vai facendo repuntar a demanda de barcos de pasaxe en todo o mundo, os estaleiros privados galegos, expertos na construción de ferris e catamaráns, están a quedarse fóra das licitacións de quen ata agora foron as súas grandes clientas, as navieras españolas.
Nos últimos 15 anos, o sector galego liderou a construción de buques deste segmento. Os estaleiros modernizaron a flota de ferris das grandes compañas como Suardíaz ou Trasmediterránea, pero, sobre todo, traballaron forte para Balearia e Armas, ás que entregaron máis dunha ducia de barcos considerados dos máis innovadores do segmento.
Os vínculos entre estas empresas e o sector galego son moi estreitos, por iso chama a atención que ningunha das novas construcións programadas para o período 2017-2019 teñan como destino un estaleiro de Galicia.
O presidente de Balearia, Adolfo Utor, presentou recentemente o plan estratéxico de investimentos da naviera para os próximos 5 anos, que ascende a 450 millóns. Pasa pola construción de tres novos buques tipo ferri (de pasaxeiros e vehículos). Un deles xa está en construción no estaleiro A Naval, de Sestao. Os outros dous foron adxudicados a Cantieri Navale Visentini, en Italia .
Confianza perdida?
As malas noticias non pairan de chegar. A naviera Armas, que construíu en Galicia máis dunha decena de buques, encargou á factoría naval australiana Incat o deseño e a construción dun novo ferri catamarán de 109 metros de eslora, que entregará a principios do 2019, para o que orzou preto de 100 millóns de euros.
O preocupante da situación, segundo apuntan fontes do sector en Galicia, é que «nin os estaleiros italianos nin os australianos son máis competitivos que os galegos en cuestión de prezo, e moito menos en coñecemento dun tipo de barco que Galicia sabe facer moi ben», din.
Só Trasmediterránea mantén a súa vinculación co naval galego, concretamente co vigués Vulcano, que, tras varios sobresaltos (incluída a ameaza de peche), encargarase de rematar para esa naviera un buque embargado que era propiedade do Banco Santander.
«É para preocuparse. Se perdemos o negocio dos ferris, que queda?» Reflexionan a modo de pregunta fontes do sector naval galego, que mentres envorca os seus esforzos en obter pedidos doutro segmento de buques (atuneros, oceanográficos ou pequenos cruceiros).
Pymar, a asociación de pequenos e medianos estaleiros españois, considera que hai máis mercado e apela ao optimismo. Baséase no impulso das contratacións rexistradas durante o segundo semestre do ano pasado e nas negociacións de novos encargos en curso, «que invitan o optimismo para este 2017».
Di esta organización que a clave será a capacidade de adaptación das compañas aos nichos de mercado que contan cunha maior demanda, como os buques de pasaxe, nos que Galicia non tivo fortuna, os oceanográficos e determinados barcos pesqueiros dun alto contido tecnolóxico. «É nestes mercados onde os estaleiros privados españois terán máis oportunidades de negocio nos próximos meses», aseguran desde Pymar.