Jaimas de produtos locais, música e tapeo para animar os sábados estradenses
DEZA
A Acoe estrea mañá a campaña Sábados na Estrada, que terá continuidade o 29 e o 5 de setembro
21 ago 2015 . Actualizado ás 05:00 h.A Asociación de Comerciantes da Estrada (Acoe) presentou onte a campaña Sábados na Estrada, que leva por subtítulo Merca, bebe e come produtos locais da Estrada na Estrada. A iniciativa ten unha dobre vertente. Por unha banda, pretende promocionar os produtos locais. Por outra, dinamizar A Estrada e o comercio estradense aproveitando a afluencia de visitantes durante a tempada estival.
O gancho para conseguir reter aos estradenses e atraer a público de fóra é triplo: oferta de produtos locais de calidade que ás veces non son doados de atopar nos supermercados, animación musical e tapeo autóctono a prezos tentadores.
A campaña arrincará mañá, día 22, e terá continuidade o sábado 29 de agosto e o 5 de setembro, sempre en horario de mañá. Na Praza do Mercado instalaranse jaimas de promoción dos produtos locais. Nelas poranse á venda embutidos de poldro, tenreira e porco celta da cooperativa Monte Cabalar, queixos do Labrador Estradenses, produtos de asínaa Embutidos Sanmartín e sidras dos lagares locais Ribela, López Pampín e Torres de Moreda. Os postos estarán xunto á zona de lecer infantil, sen restar espazo ao mercadillo dos sábados, onde a demanda de metros para instalarse xa supera á oferta.
Sidra e salmón por 5 euros
De forma paralela, a hostalería local ofrecerá unha xornada de tapeo a prezos atractivos. Nos dez locais que se sumaron á iniciativa ofertaranse, de 12.00 a 15.00 horas, dúas tapas de salmón -xenerosas, segundo os organizadores- e unha botella de sidra por 5 euros. As tapas tamén se servirán soas, a 1,5 euros cada unha. Os bares participantes son: Enredo, O Candil, A Cunca, Oasis, Beetle Caracas Cake, Eureka, Scala, Andalucía, Mimela e Tapería O Lar. A oficina da Acoe e os propios locais participantes repartirán folletos sobre a promoción que servirán de vales para participar na mesma.
Tres grupos de música animarán o mercadillo, os bares participantes na campaña e as rúas estradenses en xeral durante os Sábados na Estrada. Mañá, de 11.00 a 14.00 horas, a animación correrá a cargo do grupo Retrouso. O día 29 tomará a vez Garatuxa e o 5 de setembro tocaralle a quenda a Pana Raiada.
O programa de actividades completarase cun taller de intolerancia alimentaria impartido por persoal de téndaa bio Casa Xorxeira. Haberá dúas sesións do taller: unha mañá ás 11.00 horas e outra o día 29 á mesma hora, nunha jaima instalada na plazuela. Elaboraranse crepes e hamburguesas saudables.
Se chove, na praza
Segundo explicou onte o presidente da Acoe, Alfredo González, en caso de choiva as actividades intentarán trasladarse ao interior do edificio do Novo Mercado e a ambientación musical levará tamén aos bares participantes na promoción de tapeo.