Mañá publícase a gravación de canción española e latinoamericana que o tenor rexistrou no Auditorio
27 jul 2017 . Actualizado ás 05:00 h.Mañá publícase Intimamente (Sony), o disco que o tenor canario Celso Albelo gravou no 2015 no Auditorio de Ferrol. Trátase dunha colección de cancións que fan unha viaxe de ida e volta entre España e países latinoamericanos como Arxentina, Venezuela, México e Chile: son composicións dos españois Quintero e Turina, xunto a homólogos transoceánicos como Guastavino, Ginastera, Pérez Freire, Esparza Oteo, López Buchardo ou Brandt. Casos nos que a música culta mergullou no folclore para levalo das prazas ás salas de concertos, e que agora Albelo, xunto ao pianista Juan Francisco Parra, eleva á categoría de lied .
«As pezas que incluín acompañáronme toda a vida, desde a miña nenez e a miña adolescencia en Tenerife», destaca o tenor na presentación do disco. «Todas propoñen unha mirada ás dúas beiras deste mar que nos separa coa América hispana, pero que tamén nos une. Desde que era moi novo na miña illa tiven contacto co folclore americano, unha das miñas paixóns», engade. Moitas destas cancións representan un vínculo biográfico con Albelo, xa que as cantaba durante os seus anos de estudante e nas reunións coa súa familia. Os seus temas son universais: amor, desamor e nostalxia.
Ademais de como escenario da gravación, Galicia tamén estivo presente no xerme desta iniciativa, xa que no 2015 Albelo foi o protagonista dun ciclo de recitais organizados por Amigos da Ópera da Coruña, que ao cabo conduciría ao disco.
Precisamente Albelo terá este outono unha presenza destacada na nova tempada da Programación Lírica coruñesa: formará parte da homenaxe a Alberto Zedda cantando Guillaume Tell e será o coprotagonista, xunto á soprano Mariella Devia, da ópera Lucrezia Borgia. Ademais, presentará Intimamente e recibirá a medalla de ouro que se lle concedeu o ano pasado e que o acredita como Socio de Honra de Amigos da Ópera.