O proxecto percorre, en cinco etapas, a vida e a obra do escritor ourensán
26 abr 2017 . Actualizado ás 18:03 h.No espazo simbólico do antigo Banco de España en Ourense -agora convertido en Centro Cultural José Ángel Valente e en sede dun Catastro onte estes días se amorea a xente para reclamar pola revisión impositiva (algo que de certo daría para que Casares lle tirase proveito literario)- inaugurouse onte a mostra Vos mundos de Carlos Casares. Un proxecto creado pola Fundación Casares que conta co apoio de diferentes institucións, do Concello de Ourense á Xunta, e que logo de pasar pola cidade natal do escritor percorrerá Galicia para rematar, en decembro, no pobo de referencia para o creador de Ilustrísima: Xinzo de Limia.
Carlos Casares converteuse nun dos nomes ineludibles da literatura e a cultura galegas da segunda metade do século XX, e esa condición de personalidade poliédrica aparece reflectida nas cinco etapas-apartados nos que se divide a mostra que se poderá ver no Centro Valente ata o vindeiro 21 de maio. En Paisaxes o protagonismo é para a familia, a súa etapa de estudante, os comezos literarios e o contacto con Risco e Os artistiñas -Quessada, Acisclo Manzano, De Dios e Buciños-. Luzada, o segundo bloque da mostra, céntrase na etapa universitaria, o achegamento á poesía, a influenza de Ramón Piñeiro e os seus primeiros destinos como profesor -Viana do Bolo e Bilbao-. En A viaxe os materiais falan dos seus percorridos por Europa, o contacto con Cristina Berg ou os inicios no xornalismo literario. Coviña... fai referencia á súa experiencia como deputado na primeira lexislatura do Parlamento de Galicia e O redondel aborda a súa faceta máis pública: a do Pen Clube Galicia e a do Consello da Cultura Galega.
Montaxe de Creus e Carrasco
Vos mundos de Carlos Casares é un proxecto comisariado por Chus Martínez e Gustavo Garrido no que se recollen preto de cincocentos documentos vencellados coa figura e a obra do autor protagonista das Letras Galegas, entre eles algúns inéditos como a tese sobre Curros Enríquez e Aires dá miña terra, que logo se convertería en libro. A estrutura da mostra foi creada polos arquitectos Xoán Creus e Covadonga Carrasco e está realizada integramente en madeira. Ao ser modular e lixeira -creouse co ensamblado de 885 barras de 60x6x6 centímetros, 65 taboleiros e 6 maletas- dálle máis flexibilidade e adaptación aos espazos expositivos.