Pinto & Chinto confésanse «moi contentos» coa acollida que tivo o personaxe, e non descartan recuperalo para embarcalo en novas historias
05 feb 2017 . Actualizado ás 10:43 h.O entrañable personaxe de Nicomedes o pelón, creado por Pinto & Chinto, fai as maletas con destino a Extremo Oriente. O álbum, publicado orixinariamente baixo o selo pontevedrés Kalandraka e que xa viu edicións en galego, castelán, catalán e portugués, poderá ser gozado a partir de agora polos nenos chineses e coreanos grazas á iniciativa de dous editoriais destes países. Desde hoxe pódese dicir que na balanza comercial de Galicia hai que contar co sorriso como unha das súas exportacións.
O libro chama a atención desde o seu peculiar formato alongado ata a súa orixinal proposta visual, xa que en gran parte do álbum mantense un primeiro plano do protagonista, unicamente modificado polos novos sucesos introducidos a medida que avanza a narración. Desde o punto de vista gráfico, o ilustrador deixa un mostrario de expresións no rostro do personaxe, demostrando que con leves cambios se pode pasar da alegría ao enfado e da tristeza á sorpresa.
Pinto & Chinto contan aquí a historia de Nicomedes, quen lucía unha abundante cabeleira que para a súa desdicida foi perdendo aos poucos ata quedar completamente calvo. Non conformándose co cranio mondo e lirondo, na súa desesperación, Nicomedes proba entón unha serie de solucións para paliar a súa calvicie, a cal máis extravagante, por exemplo colocarse no alto da cabeza serpentinas ou espaguetes, que o porán en situacións comprometidas e cheas de humor mentres os autores vannos levando da man ata un final sorprendente e que sin duda sacará un sorriso aos lectores de calquera idade. Este breve divertimento, que poderiamos encadrar no xénero do nonsense, destinado preferentemente a nenos a partir dos 5 anos, converte con ton humorístico, tenro e surrealista, e apoiado nunhas ilustracións expresivas e coloridas, un relativo problema nunha gran e oportuna virtude. A obra -cuxo título orixinal é Nicomedes o pelado- mereceu no ano 2014 a distinción da Internationale Jugendbibliothek de Múnic, que a incluíu na prestixiosa selección The White Ravens, unha lista dos libros infantís e xuvenís máis destacados de cada ano aparecidos a nivel mundial.
Os autores (a parella de humoristas gráficos integrada por Carlos López e David Pintor, responsables da viñeta diaria que ocupa as páxinas de opinión do xornal La Voz de Galicia) xa foran agraciados no 2011 con leste mesmo galardón polo seu traballo Contos para nenos que dormen deseguida, volume editado tamén pola casa Kalandraka.
Pinto & Chinto confésanse «moi contentos» coa acollida que tivo o personaxe, e non descartan recuperar a Nicomedes para embarcalo en novas historias.