Todos os grupos apoian que se destinen fondos para cancelar o plan de axuste
28 jun 2017 . Actualizado ás 05:00 h.Se o ano pasado os cambios no orzamento (modificativos) fixéronse famosos porque o goberno local tropezaba unha e outra vez na mesma pedra na que se lle converteron, agora as cousas parece que flúen dun modo bastante máis engraxado. A comisión de Facenda aprobou onte modificacións nas contas que permitirán variar o destino de 5,2 millóns de euros de dúas partidas. Falta, iso si, que esas cifras pasen polo pleno, pero os partidos xa avanzan que esta vez non haberá votos contrarios.
O destino do diñeiro
Créditos e obras. A pleno o luns irán dous cambios no orzamento e a reordenación do gasto nas cubertas de Riazor. Neste último caso apróbase a licitación conxunta de obra e proxecto. As actuacións pagaranse en dúas anualidades, con 5.168.000 euros o ano próximo e 3.064.000 euros no 2019. A partida do 2018 complétase con remanentes de exercicios anteriores, incluíndo 1,1 millóns do 2016. Ademais, destínanse outros 5 millóns para liquidar a débeda contraída durante o anterior mandato e vinculada a un plan de axuste estatal. Sen esa carga desaparecen tamén as limitacións do plan, que impedía, entre outras cousas, formar parte de consorcios e empresas públicas, e obrigaba a render contas cada tres meses, facilitando, por exemplo, as cifras de execución orzamentaria. Agora o goberno local non terá que facer público ese dato, que nos dous últimos exercicios guindaba un exiguo balance de xestión. Finalmente, outra variación de 200.000 euros será para pagar facturas do IMCE.
De onde sae o diñeiro
Baixa execución. O atraso na aprobación dos orzamentos durante os dous últimos anos supuxo para o goberno deixar sen investir millóns de euros en obras e actuacións. Así, actualmente o consistorio ten un remanente de 26 millóns, dos que 20 millóns pódense destinar a distintos fins. Ese diñeiro tiña que ter sido investido, segundo o previsto nas contas anuais, pero nunca chegou a saír da caixa municipal.
Apoios
Menos enfrontamento. A Marea logrou onte unanimidade para liquidar o plan de axuste -aínda que o PP solicita que non se eliminen as medidas de aforro- e contará tamén coa colaboración dos grupos, que necesita porque está en minoría, no pleno do luns para aprobar eses asuntos. Todo sen grandes debates nin especiais tensións, igual que no modificativo da semana pasada para decidir o destino dos beneficios de Emalcsa, ao que deu luz verde o PSOE sen friccións.
Que cambiou
Outra actitude. Seguramente a volta de Pedro Sánchez á secretaría xeral marcou as relacións entre a Marea e os socialistas, que na Coruña apoiaron maioritariamente a Sánchez, máis proclive a entenderse coas novas forzas políticas. Con todo, non é esa a única novidade. A Marea tamén presenta as cousas doutro xeito. O ano pasado pretendeu, por exemplo, sacar adiante un cambio no orzamento para destinar diñeiro procedente do reservado para pagar a renda social, a comprar bicicletas para BiciCoruña. Recibiu críticas por todos os lados e tívose que gardar a súa proposta porque non logrou respaldo algún. Ademais, aquilo votouse sen negociar antes cos demais, obviando a Marea que para sacar adiante algo no pleno fan falta 14 votos, e que só ten dez. Esa actitude parece ter cambiado e agora o goberno local actúa doutro xeito. Co PSOE negociou o destino do diñeiro no caso de Emalcsa. E xa non propón cousas dificilmente defendibles en público.