Non parece que vaia a haber nin moción de censura nin pacto. Ou sexa, outra vez os orzamentos sen aprobar, e a cidade cambaleándose
04 feb 2017 . Actualizado ás 14:50 h.A maioría absoluta da cidade non confía no alcalde. É o resultado da votación deste mediodía en María Pita. Os dezaseis concelleiros do PP (10) e do PSOE (6) votaron non na cuestión de confianza á que se someteu o alcalde para tratar de sacar adiante uns orzamentos que non foi capaz de negociar coa oposición.
Pero que cambia o pleno de onte? De momento só a consumación dun divorcio entre a Marea e o PSOE, que comezou a fraguarse no mesmo momento no que, en maio de 2015, os socialistas deron o seu voto sen condicións para que Ferreiro fose elixido alcalde. Pero, o que para moitos cidadáns sería unha consecuencia lóxica da votación de hoxe non parece que estea no horizonte. Un cambio de goberno pasa por unha moción de censura que, a estas alturas, PP e PSOE non parecen en disposición de subscribir, aínda que é a eles aos que corresponde agora xogar a pelota. Porque ese acordo de dous grandes partidos políticos en situacións excepcionais que non sería estraño en moitas democracias, aquí segue sendo unha especie exótica.
O concelleiro que actuou como portavoz socialista, que quixo facer un exercicio de dignidade política subliñando que non admitirán máis humillacións por parte da Marea, deixou no entanto a porta aberta a que nas próximas semanas o alcalde acceda a negociar uns orzamentos que saquen a cidade da lameira. Volta ao momento de saída? Difícil, aínda que o alcalde, despois de zarandear de novo no pleno a un PSOE malferido, diga que a Marea están condenados a entenderse cos socialistas.
Tal como están as cousas non parece que suceda nin unha cousa nin a outra: nin moción nin pacto. Ou sexa, outra vez sen orzamento talvez ata case finalizado o primeiro trimestre, sen investimentos novos e sen transferencias a asociacións. E co Goberno local (10 concelleiros máis o apoio crítico do BNG) nesa minoría absoluta na que ata o momento parece sentirse cómodo. E a cidade, cambaleándose.