O coche chocou de fronte co animal nunha zona de curva e tanto a moza como o equino morreron no acto polo impacto
28 may 2017 . Actualizado ás 23:48 h.Yolanda Naseiro Hermida, a moza de Vilalba de 23 anos de idade que faleceu na medianoite do domingo, regresaba a casa tras participar na romaría de San Adriano. Trátase dun festexo que se celebra na parroquia vilalbesa de Goiriz, no que se dan cita os afeccionados ao mundo do equino e ao que é tradición asistir en cabalo.
A morte da moza produciuse nunha estrada secundaria e sen visibilidade, concretamente no quilómetro 2,800 da estrada provincial LUP 6502, vía que comunica o municipio de Vilalba coa parroquia de Lanzós. No momento da traxedia, a falecida viaxaba a casa acompañada doutros dous xinetes que cabalgaban uns metros máis adiante. Parece que un dos xinetes é tío da vítima e o outro é un veciño de Santaballa, a parroquia de Vilalba de onde tamén era natal a finada. Este veciño atopábase o domingo pola mañá na súa casa, moi afectado e nervioso. Recoñeceu que viaxaba con el no momento do suceso pero negouse a revelar máis datos.
Segundo fontes próximas á traxedia, a xineta falecida ía sobre o cabalo e levaba unha peza reflectora, pero podería circular polo carril esquerdo da devandita estrada. A investigación de Tráfico aclararao definitivamente. Foi nunha curva onde o equino se atopou ante un vehículo e chocaron frontalmente. Trátase dun turismo, marca Fiat Freemont, no que viaxaba un home que levaba ao lado ao seu pai. Ambos son da parroquia vilalbesa de Lanzós e coñecían á falecida e á súa a familia. Tras a colisión frontal contra o cabalo que montaba Yolanda Naseiro, a xineta e o equino faleceron no acto. Pola súa banda, o acompañante do turismo quedou atrapado e resultou ferido. O home foi evacuado ao HULA e estivo na uci ata o domingo pola mañá. Entre outras lesións, rompeu un brazo. O seu fillo, o condutor, resultou ileso, aínda que tivo que ser excarcerado.
Tras o sinistro, un gran dispositivo de urxencias púxose en marcha. Axentes do destacamento de Tráfico de Vilalba acudiron á zona e fixéronse cargo da investigación. Auxiliaron ás vítimas e regularon a circulación. Unha patrulla de atestados de Lugo tamén se presentou no lugar da traxedia para realizar o correspondente informe.
Os bombeiros de Vilalba encargáronse de excarcerar aos ocupantes do turismo e os servizos sanitarios evacuaron ao copiloto ferido ao HULA. Sobre as dúas e media da madrugada tivo lugar o levantamento do cadáver. O cabalo, de nome Cachito, foi retirado o doming.
Yolanda Naseiro cumpriría 24 anos o próximo día 8 de xuño. Natural da parroquia vilalbesa de Santaballa, era filla única e afeccionada á hípica desde moi pequena. Estudou criminología e actualmente estudaba Relacións Laborais na Universidade de Santiago. O seu pai é moi coñecido en Vilalba, posto que é un contratista de obras desta parroquia vilalbesa.
Yolanda Naseiro será enterrada esta tarde. Ás seis partirá do tanatorio de Vilalba ata Santaballa, onde se celebrará o funeral e inhumación.