CD Lugo e Cultural Leonesa xogarán o 5 de agosto un amigable en Monforte
22 jul 2017 . Actualizado ás 05:00 h.O campo municipal da Pinguela será escenario o próximo día 5, ás sete e media da tarde, dun partido amigable que disputarán o CD Lugo e a Cultural Leonesa. Será, sin duda, un dos pratos fortes da pretemporada en Monforte, que tamén se poderá presenciar na Segunda División A, xa que ambos os conxuntos serán rivais nesta categoría.
Os afeccionados poderán presenciar en directo as evolucións dos conxuntos de Rubén da Barreira -é o técnico do conxunto leonés- e de Francisco Rodríguez. No cadro lucense está o porteiro chantadino Roberto Fernández.
O custo da entrada ascenderá a doce euros. Todo o que se recade destinarase a abonar unha parte da débeda que o Club Lemos ten cos futbolistas que formaron parte do persoal a pasada campaña.
Isto xa o anunciou o anterior presidente, Antonio Pérez, na pasada asemblea de socios. É por esa razón pola que os exdirectivos fan un chamamento aos afeccionados para que poboen as bancadas do campo municipal da Pinguela
Pretemporada do CD Lugo
Os afeccionados tamén terán oportunidade de seguir as evolucións dos futbolistas do CD Lugo, xa que o cadro de Francisco Rodríguez estará de concentración entre o 1 e o 5 de agosto no hotel balneario de Augas Santas, en Pantón.
O primeiro persoal realizará varios adestramentos que serán abertos ao público no campo municipal da Pinguela. Tamén fará algunhas sesións preparatorias no campo municipal do Saviñao.
O día 2 de agosto, o CD Lugo disputará no campo municipal da Pinguela un partido amigable ante un combinado de futbolistas da AFE
O utillero Juan Rodríguez recibirá unha homenaxe
Nos prolegómenos do partido entre o CD Lugo e a Cultural Leonesa producirase un momento emotivo. O actual utillero do Club Lemos, Juan Rodríguez, recibirá unha homenaxe por parte da entidade -este acto foi promovido polo anterior presidente, Antonio Pérez- polos máis de corenta anos que leva traballando.
Rodríguez recibirá unha placa conmemorativa e podería facer o saque de honra. O protagonista deste acto continuará a próxima tempada prestando servizos no Club Lemos.