Amigable: Os branquivermellos venceron no Roxo aos de Santa Comba por 3-1: así foi o partido
27 jul 2017 . Actualizado ás 05:00 h.O Cerceda disputou na tarde de onte o seu segundo choque de pretemporada no Roxo do Piñeiro. Foi contra o Xallas de Santa Comba, ao que dobregou por 3-1.
Cerceda: Anxo, Axel, Oriol, Hugo, Balboa, Agulló, Dani Ponce, Armando, Javi Martínez, Fabio e Álvaro.
Xallas: Julián, Cristian, Pablo Vigo, Dani Becerra, Alex Canedo, Fernando Varela, Marcos, Lucio, Doro (min. 62), Julián e Kevin.
Na primeira parte, o Cerceda tivo o dominio total do esférico. Gozou de ocasións e, mesmo, gustouse ante un rival de inferior categoría. Foron uns 45 minutos nos que a afección gozou vendo a un equipo forte e con moitas posibilidades. No minuto 12 anotou Agulló o primeiro gol, de falta directa. Álvaro ampliou diferenzas no minuto 40.
Tras o descanso, ambos os adestradores, Tito Ramallo e Noé, realizaron numerosos cambios no once, o que permitiu igualar a contenda. No minuto 62 o dianteiro Doro recortaba distancias para o Xallas de Santa Comba. Con todo, Pedrosa marcou de cabeza o 3-1 definitivo no minuto 84.
Foi un encontro típico de pretemporada, con dous equipos que tratan de axustarse con vistas á liga, sobre todo o Cerceda, que só mantén nas súas filas a seis xogadores do pasado curso en Terceira. En todo caso ambos os elencos trataron de agradar aos afeccionados apostando por un xogo vistoso e combinativo.