A magnitude dos tremores, cuxo epicentro se situou no mar, foi de entre 1,5 e 2,8
31 jul 2016 . Actualizado ás 22:09 h.A terra volveu tremer a pasada madrugada en Barbanza e fíxoo en varias ocasións. O Instituto Xeográfico Nacional rexistrou catro terremotos, todos eles con epicentro no mar de Porto do Son. O primeiro tivo lugar ás 4.12 horas e a súa intensidade foi de 2,8 graos na escala Richter. Produciuse a 11 quilómetros de profundidade. Dous minutos despois quedaba rexistrado o segundo, de 1,6 graos. Ás 4.40 tiña lugar o terceiro. O seu epicentro situábase a 22 quilómetros de profundidade e quedaba anotado no informe do Instituto Xeográfico Nacional como un sismo de 1,5 graos de intensidade. O último, pouco antes das oito da mañá, foi de 2,5 graos e produciuse a 12 quilómetros de profundidade.
Non é a primeira vez que Barbanza e, en concreto, Porto do Son, rexistran un sismo. Ao contrario. Son moitos os pequenos terremotos que se rexistraron, sobre todo durante os últimos anos, nesta zona de Barbanza. De feito, o municipio sonense convertíase o pasado mes de xaneiro no territorio de España no que se rexistraron máis sismo, un total de oito. Aquel mes, houbo dous tremores que, a pesar de ter menos de 3 graos de intensidade, si foron perceptibles polos veciños de diversos puntos da comarca. O seu epicentro situouse en terra, entre os municipios de Porto do Son, A Pobra e Ribeira.