O sábado haberá unha audición para a elección de figurantes
26 abr 2017 . Actualizado ás 05:00 h.Confesou en varias ocasións as ganas que tiña de traballar na súa terra e ao fin Ramón Campos decantouse por Noia e a súa contorna para a rodaxe dunha serie. O equipo de Bambú desembarcará proximamente na localidade de láudalas, que será o centro de operacións de Fariña, unha produción baseada nunha novela de Nacho Carretero que relata a historia do narcotráfico en Galicia.
Ademais de Noia, Boiro é outra das localidades barbancesas nas que a produtora estivo buscando localizacións. Na serie que emitirá Antena 3 aparecerán tamén diversos recunchos do sur da ría arousá. A idea é trasladar ao espectador aos anos 80 e ao armazón tecido naquela época pola rede de narcotráfico galega.
A rodaxe desta serie na comarca suporá a chegada de diversas estrelas do panorama televisivo. Fariña estará protagonizada por Javier Rey , o actor noiés que saltou á fama polo seu papel de Mateo na exitosa Velvet, que nesta ocasión interpretará a un famoso narcotraficante. Recentemente confirmouse tamén a participación no proxecto doutros dous nomes coñecidos: Miriam Galego e Tristán Ulloa. Da dirección encargarase o galego Carlos Sede.
Aínda que a maquinaria desta nova serie hai tempo que entrou en funcionamento, está previsto que a rodaxe nas localizacións reais arranque a finais de maio e, dado que haberá secuencias que requiran a presenza dun elevado número de figurantes, convocouse un casting para este sábado. Terá lugar no coliseo Noela, desde as 10.00 ata as 14.00 e entre as 16.00 e as 21.00 horas.
A audición
Será unha proba sinxela, que consistirá en encher unha ficha cos datos persoais e en deixarse realizar unhas fotografías, polo que poderán sumarse todas as persoas que o desexen, independentemente de que teñan ou non experiencia no mundo da interpretación.
Desde Bambú explicaron que, inicialmente, búscase a persoas de todas as idades e características físicas, aínda que apuntan a que é preferible que non teña tatuaxes visibles nin cortes de pelo moi actuais. É probable que no futuro, a produtora recorra á procura de máis figurantes, tanto en Noia como noutras localidades de Galicia.