O conxunto non terá que disputar xornada ligueira a fin de semana
27 abr 2017 . Actualizado ás 05:05 h.O Noia non disputará xornada de liga esta fin de semana, pero os xogadores de Nano Maroño enfrontaranse hoxe, nun encontro amigable, á selección galega sub 19. Este choque servirá de preparación tanto aos noieses como ao combinado autonómico para os seus próximos partidos. O duelo terá lugar ás 20.30 horas, no pavillón municipal de Noia. Maroño aproveitará a ocasión para rodar aos seus homes de cara aos dous últimos encontros da tempada ligueira: «Estes días sen competición agardo que nos sirvan para recuperar xogadores e que non cheguen cargados de pernas aos partidos. O que hai que evitar é que se produzan lesións».
O técnico da selección galega, Juanma Marrube, utilizará duelos como o que disputará hoxe contra o Noia para decidir a convocatoria que realizará para competir no Campionato Nacional de Seleccións Territoriais que se disputará en Salou. O equipo autonómico conta nas súas filas con mozas que militan en clubs como o Leis Pontevedra, Burela, Parrulo, Prone Lugo, Casás e Lugo.
O seleccionador asegurou onte que elixiu o Noia como rival porque, ademais de querer xogar con equipos de Segunda B, «teño relación con este club e, obviamente, pola súa entidade».