Dávos Boina, Os Pericos e Restreba serán algúns dos grupos que participen
11 may 2016 . Actualizado ás 05:00 h.Sábado.?Desde as 12.00 horas.?Rianxo.?O Centro Cultural Vicente Vidal apuntouse aos seráns e estrea a tempada cunha cita que terá lugar este sábado, se o tempo non o impide, na parroquia de Leiro. A xornada arrincará pola mañá, con varios grupos xa confirmados que incitarán ao baile a partir das doce, entre os que están Dávos Boina, Os Pericos, Restreba, Vai de Coña, A Muller do Jaiteiro e Os Sen Nome. Media hora máis tarde, haberá un acto en homenaxe a Manuel María.
Para recargar as pilas, ao mediodía ofrecerase unha comida con «prezos anticrise», onde non faltarán os mexillóns, o polbo, os callos e o churrasco, todo iso regado con viño da terra.
A partir das catro, o encontro popular contará cunha batería de xogos tradicionais (carreiras de sacos e ovos, chave, ra, tiro de corda...) e con inchables para os máis pequenos. O serán retomarase a partir das sete e, unha hora máis tarde, os asistentes poderán gozar dunha queimada. O actor Nacho Castro, da serie Urxencia Cero, será o encargado de realizar o conxuro.
A cita, na que colabora o Concello e os bares Abuín e A Veliña, está aberta a todo o público, socios e non socios, do centro cultural rianxeiro.