O obxectivo é aproveitar a alta afluencia de visitantes da localidade costeira para que viaxen aos concellos de Barbanza
30 ene 2015 . Actualizado ás 05:00 h.Os rexedores da comarca están aproveitando o escaparate que supón Fitur para promocionar os seus municipios tanto a nivel nacional como autonómico, así como para facer xestións de todo tipo e, se é posible, garantirse algún investimento pendente. Neste contexto, os mandatarios de Arousa norte tiveron un frutífero encontro coa súa homóloga de Sanxenxo, Catalina González, con quen estableceron o principio dunha alianza para potenciar as rutas pola ría.
A alcaldesa explicoulles que, durante a tempada estival, hai uns cen mil visitantes en Sanxenxo, persoas que demandan alternativas para o goce do seu tempo libre e ás que, con seguridade, interesaralles coñecer a terra de Castelao, o museo de Valle-Inclán, os castros de Neixón ou o faro de Corrubedo.
O presidente da mancomunidade, Juan José Dieste, comentou que todos coincidiron en que as viaxes pola ría eran a mellor forma de favorecer o intercambio de turistas entre estas localidades. A intención é ofrecer rutas con paradas nos catro concellos, unha cuestión que, segundo Dieste, perfilarase en posteriores reunións.
Así mesmo, Isaac Maceiras comentou que as saídas desde A Pobra con destino a Ons e Cíes incrementaranse este verán debido á elevada de manda rexistrada en anos precedentes:
«Á xente hai que darlle o que reclama»
, sentenciou.
Certificado de calidade
Así mesmo, os mandatarios de Ribeira, Manuel Ruiz, e Boiro, Juan José Dieste, recolleron onte, conxuntamente con José Manuel Ferreirós, do restaurante Chicolino, os diplomas da Q de calidade. O termo boirense obtívoo polas praias de Carragueiros, A Retorta, A Ladeira do Chazo e Mañóns, mentres que Ruiz o colleu en nome do Náutico.
O GAC promociona o patrimonio submarino
O GAC 4 da Costa da Morte, ría de Muros-Noia, presentou onte en Fitur o seu novo proxecto,
Galicianseas shipwrecks Finisterre
, no que se promociona o patrimonio submarino. A iniciativa foi dada a coñecer polo rexedor fisterrán, José Manuel Traba, e ao acto tamén asistiron a xerente do GAC, Manuela Oviedo, o arqueólogo Miguel San Claudio e a empresa que executou a proposta, Achega Comunicación.
A Costa da Morte, segundo San Claudio, é a que suma máis naufraxios en todo o conxunto do litoral español e a nova oferta turística, que conta con fondos europeos, consiste, precisamente, en vincular aos visitantes co pasado desta zona dándolle a coñecer a historia de varios centenares de pecios. Para iso proponse rutas como a dos buques de guerra ou a dos galeóns. Outra das ofertas é a práctica do mergullo recreativo para descubrir os segredos destas augas.