Unha patrulla da policía salva a vida a unha muller en Xiabre tras seis horas de procura
VILAGARCÍA DE AROUSA
Os policías percorreron co seu vehículo os máis recónditos lugares do municipio arousán, buscando o automóbil no que a muller se marchou
25 abr 2017 . Actualizado ás 05:00 h.Os seus familiares deron o aviso da súa desaparición cara ás nove da noite do sábado. Seis horas máis tarde, unha patrulla do Corpo Nacional de Policía localizaba e salvaba a vida a unha muller tras percorrer Vilagarcía de arriba a abaixo na súa busca.
A familia da desaparecida decidiu acudir a Comisaría ao comprobar que a súa achegada remitira unhas mensaxes telefónicas con aparencia de despedida. Temeron que puidese estar a pensar en quitarse a vida e puxeron o feito en coñecemento dos axentes. Inmediatamente, unha patrulla púxose en marcha. Os policías percorreron co seu vehículo os máis recónditos lugares do municipio arousán, buscando o automóbil no que a muller se marchou.
Atopárono, por fin, no monte Xiabre, cara ás tres da madrugada. A condutora achábase no seu interior, en estado inconsciente. Tendo en conta que as portas permanecían pechadas, os axentes tiveron que romper un portelo para prestarlle á muller os primeiros auxilios. Un equipo do 061 conseguiu estabilizala pouco despois.