A falta de médicos substitutos impide cubrir baixas e lastra a atención primaria
O Grove
Os centros de saúde do Grove e A Illa de Arousa son dúas dos que padecen actualmente esta situación
12 may 2017 . Actualizado ás 05:00 h.No centro de saúde do Grove levan tres meses cun dos seus sete médicos de familia de baixa e a praza só se cobre parcialmente, cun substituto que acode dous días por semana. Na Illa ocorre unha situación similar. Un dos seus tres facultativos está de baixa e a súa praza só se cobre tres días á semana. Son dous exemplos dunha situación que é recorrente nos consultas de atención primaria da comarca e que ten consecuencias, tanto para os pacientes como para os profesionais. Os tempos de espera para recibir unha consulta alónganse e aos médicos que están en activo auméntalles a carga de traballo, pois ante a ausencia dun compañeiro, deben asumir parte da cota dos seus pacientes.
Desde o Servizo Galego de Saúde explican que a imposibilidade de cubrir ao cento por cento das baixas por enfermidade ou vacacións dos médicos non está motivado tanto un problema económico como de falta de profesionais dispoñibles. A lista de substitución coa que traballa a área de xestión integrada de Pontevedra e O Salnés queda curta para atender as necesidades que xorden no territorio. «É unha cuestión de fluctuación de dispoñibilidade de recursos humanos para efectuar substitucións e coberturas puntuais, pero o compromiso do Sergas sobre a garantía asistencial é permanente», segundo explican desde a administración sanitaria. O xerente da Estrutura Organizativa de Xestión Integrada de Pontevedra e O Salnés (EOXI), José Ramón Gómez, tamén aludiu onte a preguntas da prensa ao problema que supoñen as baixas, especialmente en datas próximas ao verán. «Enfermería, persoal auxiliar e non sanitario teñen máis opcións de contratación que os especialistas», indicó.
Por outra banda, profesionais do sector consultados por esta redacción dan por bos estes argumentos, pero só en parte. Recoñecen que faltan médicos, pero responsabilizan diso á propia consellería. «A área do norte de Pontevedra e unha da que rexistra máis fugas de profesionais. O que habería que preguntarse e por que marchan para outras áreas... E certo que non hai tantos médicos coma antes, hai menos paro, pero a administración ten que buscar a maneira de que volvan, buscando máis estabilidade laboral para estes profesionais». Son reflexións do médico de familia e concelleiro delegado de Sanidade no Grove, Javier Caneda, un concello onde hai menos dun mes aprobouse unha moción, por unanimidade, solicitándolle ao Sergas unha solución á precariedade de persoal que se vive no centro de saúde da localidade. «Sabemos que houbo unha visita do xerente de Atención Primaria ao centro, pero a min, nin como concelleiro nin como médico, se me informou de nada», engade o edil.
Pola súa banda, o delegado do sindicato médico Cesm-Omega, integrante da xunta de persoal da área do Salnés, Ramón Barreiro, coincide con Caneda á hora de explicar o porqué da falta de dispoñibilidade de médicos en Atención Primaria.
«Hai as dúas facetas. Hai épocas, como no verán, Nadal ou Semana Santa, que non é doado atopar substitutos porque hai pouca xente nas listas de contratación temporal, pero noutros momentos si hai médicos suficientes e tampouco se cobren as baixas ao cen por cen. Só por aforrar un euros, un problema que se está agravar desde hai catro ou cinco anos», apunta el delegado sindical. «Non se fai un esforzo por crear prazas nalgúns municipios onde son necesarias, e iso é un problema de xestión do día a día», engade Ramón Barreiro.