O agredido fora ameazado de morte
24 may 2017 . Actualizado ás 05:00 h.A Garda Civil detivo a dous mozos de Portas que terían intentado matar a un terceiro veciño desta localidade a navalladas. O agredido, que recibiu asistencia hospitalaria polas feridas, fora ameazado de morte o día anterior.
O pasado xoves, a vítima revisaba a presión das rodas do seu vehículo nunha gasolineira de Caldas cando foi abordado, increpado e ameazado polos catro ocupantes dun coche que, acto seguido, déronse á fuga despois de realizar un disparo ao aire.
Ao día seguinte, a vítima e a súa noiva circulaban polo viario que comunica Portas e Lantaño cando se atoparon que un coche con dúas persoas bloqueáballes o paso. O mozo tratou de dar a volta, pero o seu automóbil precipitouse pola cuneta ao dar marcha atrás. Mentres un dos ocupantes do coche increpaba á moza e arrebatáballe o móbil, o outro rompía dunha patada o portelo da porta do condutor e agredía á vítima cunha navalla en perna e pescozo.
A Garda Civil detivo aos catro novos que supostamente protagonizaron o incidente da gasolineira, aos que se lles acusa dun delito de ameazas. A dous deles, vincúlalles, ademais, cun presunto delito de homicidio en grao de tentativa.
Sospéitase que un dos detidos cre que a vítima puido roubar unha importante cantidade de diñeiro no domicilio dos seus pais. Isto é negado desde a contorna da familia da vítima.