Esa é a estimación da organización da Heroican Race, que transformará o próximo día 7 Ribadeo
27 abr 2017 . Actualizado ás 05:00 h.Na súa segunda edición, a carreira de obstáculos Heroican Race de Ribadeo reunirá o próximo día 7, segundo estima a organización (o grupo Serviocio/BeOne, coa colaboración do Concello), a uns 1.500 participantes, cifra insólita nunha proba deportiva na Mariña. A estas alturas, na web onde se formalizan as inscricións hai máis de 1.150, pero a cifra real é superior, xa que hai grupos inscritos que non se contan. E o propio día da proba sumaranse máis, como acompañantes.
O ano pasado, aínda que houbo pouco máis de 800 inscritos, ao final crese que tomaron parte nas diferentes quendas máis de mil persoas. Son cifras humillantes, e máis se se ten en conta que para competir en Ribadeo estas 1.500 persoas non teñen problema en pagar os entre 20 e 35 euros que custa a inscrición, que inclúe camiseta, medalla e seguro.
Como se explica o tirón desta proba, a pesar da súa escasa tradición, xa que a deste ano será a segunda edición? Sin duda porque falamos dun dos deportes de moda: as carreiras de obstáculos. E tamén polo éxito da primeira edición, con Ribadeo envorcado, cuns percorridos moi atractivos, polo medio do pobo, tanto para os participantes como para os máis de 2.000 espectadores que seguiron as carreiras. A xente que participou quedou máis que satisfeita. Moita repetirá e, á vista está, uns chamaron a outros.
Pero o impacto desta proba vai moito máis alá do ámbito deportivo. O Concello de Ribadeo renunciou a ser sede do campionato de España xuvenil de baloncesto, que se celebrará noutras vilas da Mariña, para non pagar os 3.000 euros que pediu a organización a cada Concello. Un dos argumentos foi que esa fin de semana Ribadeo ía estar cheo de xente, pola Heroican Race. E o certo é que o tempo, polo menos neste aspecto, deu a razón ao Concello. É lóxico pensar que a estas alturas as prazas hostaleiras de Ribadeo xa estean esgotadas para esa fin de semana.
O día 7, Ribadeo estará tomado polo deporte, desde o inicio das quendas á primeira hora da mañá. O percorrido será duns 7 a 9 quilómetros, no que haberá que sortear de 25 a 30 obstáculos, e estará completamente sinalizado e pechado ao tráfico.
A proba ribadense é unha carreira das máis espectaculares, cun percorrido polo centro urbano e os arredores con obstáculos tanto naturais como artificiais, que deberán pasarse como indique o xuíz que se atope nel, nunca sorteándoos. En caso de esquivalo, o atleta deberá realizar a penalización que indique o xuíz: facelo doutro modo suporá non optar aos premios establecidos e ser descualificado da proba, indícase nas bases da carreira.
Haberá diferentes categorías, desde amateur a elite, cos mellores atletas da modalidade no país, que serán precisamente os que inicien as probas, ás dez da mañá.