Ao amplo operativo de urxencias sumáronse tamén os bombeiros de Viveiro
26 abr 2017 . Actualizado ás 19:30 h.Un amplo operativo de urxencias continúa despregado nestes momentos para intentar sufocar as chamas que afectan á nave de Froitas Morriña, localizada na recta de Forxán, nunha das entradas á vila de Foz. Desde o 112 confirmaron fai varios minutos que, polo momento, non se ten constancia de que haxa feridos, aínda que na nave traballan a diario entre dez e doce persoas.
Foi un particular o que alertou pasadas as tres e media da tarde ao 112, que enviou ao lugar a bombeiros do parque de Barreiros, a efectivos do GES de Cervo, a axentes da Policía Local e a membros de Protección Civil. Debido á virulencia das chamas foi necesaria tamén a intervención dos bombeiros do parque de Viveiro.
Varias fontes consultadas confirmaron que o incendio se iniciou na parte traseira da nave e que foron os propios traballadores os que conseguiron sacar ao exterior varios vehículos de repartición. As mesmas fontes indican que unha casa próxima, situada a uns cincuenta metros, non corre perigo.
Nestes momentos continúan traballando para sufocar as chamas na nave da empresa Froitas Morriña, segundo confirmaron desde o 112 e outras fontes. Unha gran columna de fume pode verse desde distintos puntos do centro urbano de Foz.