O equipo mariñán foi incapaz de gañar ao Levante e rematou asinando un empate 4-4
29 abr 2017 . Actualizado ás 00:05 h.O Peixes Rubén-Burela vaise a Segunda. E da forma máis dolorosa posible. Todo parecía idílico, co pavillón de Vista Alegre repleto, ante un rival que non se xogaba nada, e co Santiago Futsal botando unha man en Cartaxena (2-2). Con todo, o equipo de Tomás de Dios foi incapaz de cumprir coa súa parte e gañar ao Levante.
O cadro mariñán mostrouse sobreimplicado. Notouse en cada balón dividido, e tamén cada vez que puido saír da cova á carreira. Así, aos 20 segundos xa mandaba cun tanto de José Carlos nun córner. E aos seis minutos Iago Rodríguez puxo o 2-0 ao culminar unha boa transición de Hélder. Pero aí, cando todo parecía a favor, traizoou ao Burela o seu sobreimplicación. Foi incapaz de ler o partido para pechalo, e atopouse a un Levante que, aínda sen nada en xogo, non regalou nada.
Remontou o equipo valenciano liderado por Buendía, que marcou un triplete despois de que Tripodi iniciase a conta. Antes, José Carlos puxera o 3-3 nunha gran xogada de Iago Rodríguez, que tamén mandou un libre directo ao traveseiro. Pero ao descanso chegouse con 3-4.
A segunda metade foi un quero e non podo constante dos laranxas. Encerraron aos blaugranas, pero faltoulles eficacia no remate. Só Antoñito, nunha xenialidade, deu esperanzas cando aínda restaban sete minutos. Ninguén máis puido bater a un Yeray inmenso cando o seu equipo quedou cun menos pola dobre amarela a Lucho, e tamén cando Antoñito se vestiu a camiseta de porteiro-xogador.