Outro espectacular barco deseñado por Rolls Royce Marine asucando a ría ribadense

Onte pola tarde, pasadas as 17 horas, tivo lugar a botadura dun deses barcos singulares que cada certo tempo saen das instalacións de Estaleiros Gondán. A firma asentada en Figueras xa ten flotando sobre as augas da Ría ribadense o Edda Passat, unha embarcación de 81 metros de eslora e 17 de manga que terá o obxectivo de transportar operarios para o mantemento de parques eólicos mariños.

É a primeira vez que en España se fai un barco destas características. “O primeiro de España e un dos poucos que se fixeron en toda Europa”, asegurou onte o director do estaleiro, Álvaro Platero . Ademais de por o seu aspecto, grazas a un elegante deseño de Rolls Royce Marine, o buque destaca pola súa avanzada tecnoloxía e maquinaria que ordenou instalar o seu armador, o noruegués Ostensjo Rederi. O barco, cando sexa entregado, terá unha pasarela de máis de 30 metros que permitirá á trintena de técnicos a bordo acceder directamente a eses aeroxeradores mariños. Tamén levará no seu interior outra pequena embarcación de 11 metros para prestar axuda. Desempeñará o seu traballo nunha zona situada a uns 30 quilómetros da costa de Inglaterra. Entregarase nos próximos meses, pero Estaleiros Gondán leva tempo xa traballando na construción dun segundo barco xemelgo que tamén se empregará no mantemento de plataformas eólicas mariñas. Neste caso, a súa entrega está prevista para mediados ou finais de 2018.

A empresa segue atravesando un momento doce, aínda que nas últimas datas o traballo hase reducido debido á marcha de varias embarcacións. Esta mesma semana, por exemplo, abandonou a ría de Ribadeo uno dos tres remolcadores de propulsión dual que constrúe a firma naval en Figueras. A pesar diso, as pretensións de Gondán é atar nas próximas semanas novos contratos.

---

---

---